මැදපෙරදිග කලාපයේ පවතින යුදමය වාතාවරණය හමුවේ මෙරටට එල්ල වන බලපෑම් අවම කර ගැනීමට වත්මන් රජය කටයුතු කර ඇත්තේ ඉතා ප්රමාද වී බව එක්සත් ජාතික පක්ෂ සභාපති වජිර අබේවර්ධන මහතා චෝදනා කරයි. ඊයේ (16) පැවැති මාධ්ය හමුවකදී අදහස් දක්වමින් ඔහු කියා සිටියේ, ඇමරිකානු ජනාධිපති ඩොනල්ඩ් ට්රම්ප්ගේ ක්රියාකලාපය මෙන්ම රුසියාව සහ චීනය වැනි රටවල ජාත්යන්තර හැසිරීම් පිළිබඳව රජය නිසි අධ්යයනයක නිරත විය යුතුව තිබූ බවයි. එවැනි පෙරසූදානමක් තිබුණේ නම් වර්තමානයේ පවතින ඉන්ධන හිඟය වැනි බරපතළ අර්බුද මඟහරවා ගැනීමට රජයට අවස්ථාව තිබූ බව ඔහු වැඩිදුරටත් පෙන්වා දුන්නේය.
මීට අමතරව, මෙවර අලුත් අවුරුදු නැකැත් සීට්ටුව සම්බන්ධයෙන් පවතින ගැටලුකාරී තත්ත්වය පිළිබඳව ද අදහස් දැක්වූ අබේවර්ධන මහතා, පසුගිය යහපාලන රජය සමයේ සියලු පාර්ශ්වයන් සමඟ සාකච්ඡා කර ආගමික උත්සව සහ නිවාඩු දින තීරණය කළ විධිමත් ක්රමවේදය වත්මන් රජය අනුගමනය කර නොමැති බව පැවසීය. පවතින අර්බුද හමුවේ රජයට ඉදිරියට යාමට නොහැකි බැවින් වහාම පාර්ලිමේන්තුව විසුරුවා හැර මහ මැතිවරණයක් පවත්වන ලෙස ද ඔහු මෙහිදී යෝජනා කළේය.
