දුම්පානය නතර කිරීමේ උපක්රමයක් ලෙස ප්රවර්ධනය කළද, විද්යුත් සිගරට් භාවිතය (Vaping) සාමාන්ය දුම්වැටි තරම්ම ශරීරයට අහිතකර විය හැකි බවත්, එමඟින් මුඛ සහ පෙනහළු පිළිකා ඇතිවීමේ දැඩි අවදානමක් පවතින බවත් ඕස්ට්රේලියානු පර්යේෂකයන් කණ්ඩායමක් අනතුරු අඟවයි.
සිඩ්නි නුවර නිව් සවුත් වේල්ස් විශ්වවිද්යාලයේ (UNSW) පර්යේෂකයන් කණ්ඩායමක් විසින් 2017 සහ 2025 වසර අතර කාලය තුළ විද්යුත් සිගරට්වල අහිතකර බලපෑම් පිළිබඳව පළ වූ සියලුම පර්යේෂණ පත්රිකා විශ්ලේෂණය කරමින් මෙම නිගමනයට එළඹ ඇත. ඔවුන් පෙන්වා දෙන්නේ විද්යුත් සිගරට් භාවිතය නිසා මිනිස් සිරුරේ DNA වෙනස් වීම්වලට ලක්වන බවත්, එමඟින් පිළිකා සෛල වර්ධනය වීමේ අවදානම ඉහළ යන බවත්ය. එසේම ශ්වසන පද්ධතියේ පටකවලට හානි සිදු කිරීම නිසා පෙනහළු පිළිකා ඇතිවීමටත්, මුඛයේ ක්ෂුද්ර ජීවී පද්ධතිය (Oral Microbiome) වෙනස් වීම නිසා මුඛ පිළිකා ඇතිවීමටත් මෙය ප්රධාන වශයෙන් බලපාන බව ඔවුන් සොයාගෙන තිබේ.
විශේෂයෙන්ම සාමාන්ය දුම්වැටි සහ විද්යුත් සිගරට් යන දෙවර්ගයම භාවිතා කරන පුද්ගලයන්ට පෙනහළු පිළිකා වැළඳීමේ අවදානම සිව්ගුණයකින් (Fourfold) ඉහළ යන බව මෙම අධ්යයනයෙන් හෙළි වී ඇත. සාමාන්ය දුම්වැටිවල අඩංගු ‘තාර’ (Tar) හෝ කාබන් මොනොක්සයිඩ් මෙහි අඩංගු නොවුණද, පිළිකා කාරකයක් වන ෆෝමල්ඩිහයිඩ් (Formaldehyde) වැනි විෂ රසායනික ද්රව්ය අඩු මට්ටම්වලින් මෙහි අඩංගු වීම ශරීරයට දැඩි ලෙස අහිතකර වේ.
පර්යේෂණ කණ්ඩායමේ ප්රධානියා වන මහාචාර්ය බර්නාඩ් ස්ටුවර්ට් සඳහන් කරන්නේ විද්යුත් සිගරට් යනු සාමාන්ය දුම්පානයට වඩා ආරක්ෂිත විකල්පයක් නොවන බවත්, එය ඉතාමත් භයානක පුරුද්දක් බව ජනතාව අවබෝධ කරගත යුතු බවත්ය. එංගලන්තයේ ජාතික සෞඛ්ය සේවය (NHS) පවා 2023 වසරේ සිට දුම්පානය නතර කිරීමට උත්සාහ කරන රෝගීන්ට විද්යුත් සිගරට් නිර්දේශ කළද, නවතම සොයාගැනීම් අනුව එය තරුණ පරපුර අතර පිළිකා අවදානම ඉහළ නැංවීමට සෘජුවම දායක වන බව විශේෂඥයෝ වැඩිදුරටත් අවධාරණය කරති.
