විද්යුත් වේදිකාවන් (Electronic Platforms) හරහා සපයනු ලබන ඩිජිටල් සේවා මත පනවන ලද එකතු කළ අගය මත බද්ද (VAT) ක්රියාත්මක කිරීමේ දිනය 2026 ජූලි මස 01 වනදා දක්වා තවදුරටත් කල් දැමීමට දේශීය ආදායම් දෙපාර්තමේන්තුව තීරණය කර තිබෙනවා. 2025 අංක 4 දරන එකතු කළ අගය මත බදු (සංශෝධන) පනත මඟින් මුලින්ම මෙම බද්ද 2025 ඔක්තෝබර් 01 වනදා සිට ක්රියාත්මක කිරීමට නියමිතව තිබුණා. කෙසේ වෙතත්, මෙම නව බදු ක්රමවේදයට අනුගත වීම සඳහා තමන්ට ප්රමාණවත් කාලයක් අවශ්ය බවට මෙරටට ඩිජිටල් සේවා සපයන විදේශීය ආයතන කළ ඉල්ලීම් සලකා බලා එම දිනය මීට පෙර 2026 අප්රේල් 01 දක්වා කල් දැමීමට රජය පියවර ගත්තා. නවතම නිවේදනයට අනුව එම සහන කාලය තවදුරටත් දීර්ඝ කරමින් 2026 ජූලි 01 දක්වා බදු අය කිරීම කල් දමා තිබෙනවා.
මෙම නව බදු ක්රමය යටතේ ශ්රී ලංකාවේ සිටින පාරිභෝගිකයන් වෙනුවෙන් අන්තර්ජාලය හරහා විවිධ සේවාවන් සපයන මෙරට පදිංචි නොවන (Non-resident) විදේශීය පුද්ගලයන් හෝ ආයතන බදු ගෙවීමට යටත් වන බවයි සඳහන් වන්නේ. ඒ අනුව පසුගිය මාස 12ක කාලය තුළ රුපියල් මිලියන 60 ඉක්මවා සේවාවන් සපයා ඇති හෝ අවසන් කාර්තුව තුළ රුපියල් මිලියන 15 ඉක්මවා සේවාවන් සලසා ඇති සියලුම ඩිජිටල් සේවා සපයන්නන් මේ සඳහා ලියාපදිංචි වීම අනිවාර්ය කෙරෙනවා.
