රජය විසින් යළි හඳුන්වා දුන් QR ඉන්ධන පද්ධතිය හේතුවෙන් අලුතින් ආනයනය කරනු ලබන ලියාපදිංචි නොකළ වාහන සඳහා ඉන්ධන ලබාගැනීමේ දැඩි අර්බුදයකට මුහුණ දී සිටින බව ශ්රී ලංකා වාහන ආනයනකරුවන්ගේ සංගමය පවසයි. අද (16) පැවති මාධ්ය හමුවකදී එම සංගමයේ සභාපති ප්රසාද් මානගේ මහතා පෙන්වා දුන්නේ, ලියාපදිංචි අංකයක් නොමැති මෙම වාහන හම්බන්තොට වරායේ සිට කොළඹ දක්වා ධාවනය කරවීමට අවශ්ය අවම ඉන්ධන ප්රමාණය පවා ලබාගැනීමට වර්තමාන ක්රමය යටතේ නොහැකි වී ඇති බවයි.
මසකට වාහන 100ත් 150ත් අතර ප්රමාණයක් ගෙන්වන ප්රධාන පෙළේ ආනයනකරුවන්ට සිය පෞද්ගලික QR කේත භාවිත කර මෙවැනි වාහන තොගයකට ඉන්ධන ලබාදිය නොහැකි බව හෙතෙම අවධාරණය කළේය. එමෙන්ම ප්රදර්ශනාගාර (Showrooms) තුළ පවතින වාහන සඳහා ද ඉන්ධන ලබාගැනීමට ක්රමයක් නොමැති වීම මෙම ව්යාපාරයට දැඩි බලපෑමක් එල්ල කරන බව ඔහු සඳහන් කරයි.
රජයට වැඩිම බදු ආදායමක් ගෙනෙන ක්ෂේත්රයක් වන බැවින්, චැසි අංකය (Chassis Number) හෝ ව්යාපාරික ලියාපදිංචි අංකය පදනම් කරගත් විශේෂිත QR කේතයක් හෝ ඉන්ධන කෝටාවක් මෙම වාහන සඳහා හඳුන්වා දෙන ලෙස සංගමය රජයෙන් ඉල්ලීමක් කරයි. මේ සම්බන්ධයෙන් රජය සමඟ කඩිනම් සාකච්ඡාවකට ද ඔවුන් සූදානමින් සිටින බව මානගේ මහතා වැඩිදුරටත් කියා සිටියේය.
