මැදපෙරදිග පවතින යුදමය වාතාවරණය හමුවේ චීනය සහ තායිලන්තය ගුවන් යානා ඉන්ධන (Jet Fuel) අපනයනය අත්හිටුවීමට තීරණය කිරීමත් සමඟ, එළඹෙන අප්රේල් මාසයේ සිට සිය ගුවන් ගමන් වාර සැලකිය යුතු ලෙස සීමා කිරීමට සිදුවනු ඇතැයි වියට්නාම බලධාරීන් අනතුරු අඟවයි. වියට්නාමයට අවශ්ය ගුවන් යානා ඉන්ධන ප්රමාණයෙන් තුනෙන් දෙකකට වඩා වැඩි ප්රමාණයක් ආනයනය කරනු ලබන අතර ඉන් 60%ක්ම සැපයෙන්නේ චීනය සහ තායිලන්තයෙනි.
චීනය සිය පිරිපහදු මඟින් සිදු කරන අපනයන සීමා කර ඇති අතර තායිලන්තය ද මාර්තු 6 වැනිදා සිට ක්රියාත්මක වන පරිදි මියන්මාරය සහ ලාඕසය හැර අනෙකුත් රටවල් සඳහා ඉන්ධන අපනයනය තහනම් කර තිබේ. මේ හේතුවෙන් අප්රේල් මස මුල සිට වියට්නාම ගුවන් සේවාවන් සඳහා ඉන්ධන හිඟයක් ඇතිවීමේ දැඩි අවදානමක් පවතින බව එරට සිවිල් ගුවන් සේවා අධිකාරිය ප්රවාහන අමාත්යාංශය වෙත දැනුම් දී ඇත. විශේෂයෙන්ම අත්යවශ්ය දේශීය ගුවන් ගමන් සඳහා පමණක් ප්රමුඛතාවය ලබා දෙන ලෙසත් අනෙකුත් ගුවන් ගමන් වාර පිළිබඳව නැවත සලකා බලන ලෙසත් ගුවන් සමාගම් වෙත උපදෙස් දී තිබේ.
මෙම අර්බුදයට විසඳුම් සෙවීම සඳහා වියට්නාමය මේ වන විට රාජ්ය තාන්ත්රික මට්ටමින් සාකච්ඡා ආරම්භ කර ඇති අතර වියට්නාම විදේශ අමාත්ය ලී හෝයි ට්රන්ග් මහතා චීන විදේශ අමාත්ය වැන්ග් යී මහතාගෙන් බලශක්ති සුරක්ෂිතතාව වෙනුවෙන් සහාය ඉල්ලා ඇත. එමෙන්ම දකුණු කොරියාව, ජපානය, බෲනායි සහ ඉන්දියාව වැනි රටවලින් විකල්ප ලෙස ඉන්ධන ලබා ගැනීමට ඇති හැකියාව පිළිබඳව ද අවධානය යොමු වී තිබේ. කෙසේ වෙතත් සිංගප්පූරු වෙළඳපොළේ ගුවන් යානා ඉන්ධන බැරලයක මිල යුද්ධයට පෙර පැවැති මට්ටමට වඩා එකහමාර ගුණයකින් පමණ ඉහළ යාම නිසා සැපයුම ස්ථාවර වුව ද ගුවන් ගමන් ගාස්තු ඉහළ යාම සහ ඇතැම් ගුවන් මාර්ග පවත්වාගෙන යාම ලාභදායී නොවන බවට ද අනතුරු ඇඟවීම් නිකුත් කර ඇත.
