තමිල්නාඩු දේශපාලනයට පිවිසි සුපිරි නළු විජයිගේ ‘තමිලග වෙට්ට්රි කසාගම්’ (TVK) පක්ෂය, 2026 තමිල්නාඩු ප්රාන්ත මැතිවරණය ඉලක්ක කරගනිමින් සිය මැතිවරණ සටන නිල වශයෙන් ආරම්භ කර තිබේ. වේලෝර් (Vellore) හි පැවති දැවැන්ත ජනහමුවක් අමතමින් විජයි ප්රකාශ කළේ ඉදිරි මැතිවරණය “පිවිතුරු බලවේගයක් වන TVK සහ දුෂ්ට බලවේගයක් වන DMK” අතර සෘජු සටනක් වනු ඇති බවයි.
වත්මන් මහ ඇමති එම්.කේ. ස්ටාලින්ගේ රජය දැඩි ලෙස විවේචනය කළ විජයි, ස්ටාලින් මහතා ජනතාවට බොරු පොරොන්දු ලබා දෙමින් ඔවුන්ව රවටන බවට චෝදනා කළේය. “තමිල්නාඩු මැතිවරණයේදී තරඟය පවතින්නේ විජයි සහ ස්ටාලින් සර් අතරයි. තමිල්නාඩුව යනු විජයි වන අතර විජයි යනු තමිල්නාඩුවයි” යනුවෙන් ඔහු එහිදී අවධාරණය කර සිටියේය.
තම පක්ෂයේ සලකුණ වන “විසිල්” (Whistle) සලකුණ මුල් කරගනිමින් මෙය “විසිල් විප්ලවය” ලෙස ඔහු හැඳින්වීය. තම පක්ෂයේ ඡන්දය කිසිවෙකුට මිලට ගත නොහැකි බවත්, රජයක් පිහිටුවීමෙන් පසු තමා පෞද්ගලිකව සෑම දිස්ත්රික්කයකම සංචාරය කරමින් ජනතාව හමුවන බවත් ඔහු පොරොන්දු විය. දූෂණයෙන් තොර සහ පොරොන්දු ඉටු කරන පාලනයක් සිය අරමුණ බව විජයි මෙහිදී වැඩිදුරටත් ප්රකාශ කළේය.
විජයිගේ මෙම සෘජු දේශපාලන ප්රවේශය සහ ස්ටාලින්ට එරෙහි ප්රහාරය හේතුවෙන් තමිල්නාඩුවේ සම්ප්රදායික දේශපාලන පක්ෂ අතර මේ වන විට දැඩි නොසන්සුන්තාවයක් සහ උනන්දුවක් නිර්මාණය වී තිබේ.
