ජිනීවා නුවරදී පැවැත්වෙන නිරායුධකරණ සමුළුවේ (Conference on Disarmament) ඉහළ පෙළේ සැසිය වීඩියෝ පණිවිඩයක් ඔස්සේ අමතමින් විදේශ කටයුතු, විදේශ රැකියා සහ සංචාරක අමාත්ය විජිත හේරත් මහතා ගෝලීය සාමය සහ ආරක්ෂාව තහවුරු කිරීම සඳහා ශක්තිමත් බහුපාර්ශ්වීය පද්ධතියක ඇති වැදගත්කම අවධාරණය කළේය. මොරොක්කෝ තානාපති ඕමාර් ස්නිබර් මහතාගේ ප්රධානත්වයෙන් ඊයේ (23) ආරම්භ වූ මෙම සමුළුව එළඹෙන පෙබරවාරි 25 වැනිදා දක්වා පැවැත්වීමට නියමිතය.
ගෝලීය දකුණේ දියුණු වෙමින් පවතින දූපත් රාජ්යයක් ලෙස ශ්රී ලංකාව පසුගිය වසර කිහිපය පුරා ලෝක නිරායුධකරණ කටයුතුවලදී ඉටුකළ සක්රීය භූමිකාව අමාත්යවරයා මෙහිදී සිහිපත් කළේය. විශේෂයෙන්ම අභ්යවකාශය තුළ අවි තරගයක් ඇතිවීම වැළැක්වීම සහ න්යෂ්ටික අවි සම්පූර්ණයෙන්ම තුරන් කිරීම සම්බන්ධයෙන් ශ්රී ලංකාවේ ස්ථාවරය ඔහු යළිත් තහවුරු කළේය. මීට අමතරව, මැද පෙරදිග කලාපය න්යෂ්ටික අවිවලින් තොර කලාපයක් බවට පත්කිරීම සඳහා ශ්රී ලංකාව අඛණ්ඩව සහාය දක්වන බව ද අමාත්ය හේරත් මහතා වැඩිදුරටත් කියා සිටියේය.
නවීන තාක්ෂණයේ දියුණුව ජාත්යන්තර මානුෂීය නීතිය කෙරෙහි ඇති කරන බලපෑම පිළිබඳව ශ්රී ලංකාව දැඩි අවධානයෙන් පසුවන බවත්, ස්වයංක්රීය මාරක අවි පද්ධති (Lethal Autonomous Weapons Systems) තහනම් කිරීම සඳහා නීත්යානුකූලව බැඳී පවතින ජාත්යන්තර ගිවිසුමක් ඇති කර ගැනීමට ශ්රී ලංකාව නිරන්තරයෙන් පෙනී සිටින බවත් ඔහු මෙහිදී පෙන්වා දුන්නේය. එක්සත් ජාතීන්ගේ මහලේකම් ඇන්ටෝනියෝ ගුටරෙස් මහතා ද මෙම සැසිය අමතමින් වර්තමාන භූ-දේශපාලනික ආතතීන් හමුවේ බහුපාර්ශ්වීය සබඳතා යළි පණ ගැන්වීමේ වැදගත්කම පැහැදිලි කළේය.
1978 වසරේදී පිහිටුවන ලද නිරායුධකරණ සමුළුව, ජාත්යන්තර ප්රජාව සතු එකම බහුපාර්ශ්වීය නිරායුධකරණ සාකච්ඡා වේදිකාව වන අතර ශ්රී ලංකාව එහි ආරම්භක සාමාජිකයෙකි. න්යෂ්ටික අවි සතු රටවල් පහ ඇතුළුව සාමාජික රටවල් 65කින් මෙම සමුළුව සමන්විත වේ. මෙවර සැසියේදී ශ්රී ලංකාව නියෝජනය කරමින් ජිනීවාහි ශ්රී ලංකා නිත්ය නියෝජිත තානාපති සුමිත් දසනායක මහතා ද එක්ව සිටියේය.
