ජර්මානු මෝටර් රථ දැවැන්තයෙකු වන Volkswagen සමාගම, චීනයේ Xpeng සමාගම සමඟ ඒකාබද්ධව නිපදවන ලද ප්රථම විද්යුත් මෝටර් රථ මාදිලිය වන ‘ID. UNYX 08’ හි මහා පරිමාණ නිෂ්පාදන කටයුතු ආරම්භ කර ඇති බව අද (13) නිවේදනය කළේය. චීන වෙළඳපොළ තුළ සිය ආධිපත්යය යළි තහවුරු කරගැනීමේ අරමුණින් මෙම වසර තුළ පමණක් නව මාදිලි 20කට අධික සංඛ්යාවක් හඳුන්වා දීමට Volkswagen සැලසුම් කර ඇති අතර, මෙම නව විද්යුත් SUV රථය එහි සුවිශේෂී සන්ධිස්ථානයක් වනු ඇත.
BYD සහ Geely වැනි දේශීය චීන සමාගම්වලින් එල්ල වන දැඩි තරගකාරිත්වයට මුහුණ දීම සඳහා Volkswagen සමාගම “චීනය තුළ, චීනය වෙනුවෙන්” (In China, for China) යන නව උපායමාර්ගය අනුගමනය කරයි. මෙමගින් මෝටර් රථ නිපදවීමේ කාලය 30%කින් පමණ වේගවත් කිරීමට ඔවුන් සමත්ව ඇති අතර, සාමාන්යයෙන් වසර ගණනාවක් ගතවන නිෂ්පාදන ක්රියාවලියක් වන ID. UNYX 08 රථය මාස 24ක් වැනි කෙටි කාලයකදී මහා පරිමාණ නිෂ්පාදනයට ගෙන ඒමට ඔවුන්ට හැකි වී තිබේ.
මෙම වසරේ මුල් භාගයේදී අලෙවියට නිකුත් කිරීමට නියමිත මෙම නව මාදිලිය, Volkswagen සමාගම චීනය තුළ මෙතෙක් දියත් කළ දැවැන්තම විද්යුත් වාහන ව්යාපෘතියේ ආරම්භය ලෙස සැලකේ. චීන පාරිභෝගික රුචිකත්වයට ගැලපෙන පරිදි දේශීය තාක්ෂණය සහ ජර්මානු ඉංජිනේරු ශිල්පය මුසු කරමින් නිර්මාණය කර ඇති මෙම රථය, ලොව විශාලතම මෝටර් රථ වෙළඳපොළ තුළ Volkswagen හි අනාගතය තීරණය කරනු ඇතැයි විශ්ලේෂකයෝ පවසති.
