වැලිසර ශ්රී ලංකා නාවික හමුදා කඳවුරු භූමියේ කොටසක් ආශ්රිතව ඉදිකරන ලද නවතම අධිආරක්ෂිත බන්ධනාගාරය වෙත, රටේ ප්රබල පාතාල සාමාජිකයන් සහ මත්ද්රව්ය ජාවාරම්කරුවන් පිරිසක් පළමු අදියර යටතේ මාරු කර යවා තිබේ. මෙලෙස නව බන්ධනාගාරය වෙත මාරු කර යැවූ රැඳවියන් අතර ‘වෙලේ සුදා’, ‘දෙමටගොඩ චමින්ද’, ‘මිදිගම රුවන්’, ‘ලොකු පැටී’, ‘මන්න රමේෂ්’, ‘බැකෝ සමන්’ සහ ‘ආමි සම්පත්’ යන අය වෙති. මීට අමතරව, ඉදිරි දින කිහිපය තුළ ‘හරක් කටා’ සහ ‘කෙහෙල්බද්දර පද්මේ’ යන ප්රබල පාතාල සාමාජිකයන් ද මෙම බන්ධනාගාරය වෙත මාරු කිරීමට කටයුතු යොදා ඇති බව වාර්තා වේ.
මෙම බන්ධනාගාරයේ ආරක්ෂාව සම්බන්ධයෙන් විශේෂිත සහ දැඩි නීතිමාලාවක් ක්රියාත්මක කෙරෙන අතර රැඳවියන්ට කිසිදු ආකාරයකින් බාහිර පාර්ශ්වයන් සමඟ දුරකථන සබඳතා පැවැත්වීම සම්පූර්ණයෙන්ම තහනම් කර ඇත. ඔවුන් වෙත ආහාර ලබා දීම සඳහා ද විශේෂිත සහ ආරක්ෂිත ක්රමවේදයක් හඳුන්වා දී තිබේ. මෙම බන්ධනාගාරය නිරන්තර පරීක්ෂාවට ලක් කිරීම සඳහා අපරාධ පරීක්ෂණ දෙපාර්තමේන්තුව (CID), පොලිස් විශේෂ කාර්ය බලකාය (STF), බන්ධනාගාර දෙපාර්තමේන්තුව සහ ශ්රී ලංකා නාවික හමුදාව ඒකාබද්ධව කටයුතු කරනු ලබයි.
ආරක්ෂාව තවදුරටත් තහවුරු කිරීම සඳහා බන්ධනාගාරය තුළ පැය 24 පුරා ක්රියාත්මක වන CCTV කැමරා පද්ධතියක් සවිකර ඇති අතර රැඳවියන් රඳවා සිටින මැදිරි තුළ සිදුවන කතාබහ පටිගත කිරීම සඳහා නවීන හඬ පටිගත කිරීමේ තාක්ෂණය ද යොදාගෙන තිබේ. පාතාල ක්රියාකාරකම් සහ බන්ධනාගාර ආශ්රිතව සිදුවන නීති විරෝධී ක්රියා මැඩපැවැත්වීමේ අරමුණින් මෙම විශේෂිත බන්ධනාගාරය ස්ථාපිත කර ඇති අතර මෙහි රඳවා සිටින රැඳවියන්ගේ සෑම ක්රියාකාරකමක්ම දැඩි නිරීක්ෂණයට ලක් වනු ඇති බව බලධාරීහු පවසති.
