ඇමරිකා එක්සත් ජනපදයේ ප්රාන්ත 10ක් පසු කරමින් දින 110ක් පුරා සාමය වෙනුවෙන් පැවැත්වූ පාගමනට සමගාමීව මෙරටදී සංවිධානය කර ඇති ‘Walk for Peace Program in Sri Lanka’ සාම පාගමනට රාජ්ය අනුග්රහය ලබාදීම පිළිබඳ විශේෂ සාකච්ඡාවක් ඊයේ (02) ජනාධිපති කාර්යාලයේදී පැවැත්විණි. ජනාධිපති ලේකම් ආචාර්ය නන්දික සනත් කුමානායක මහතාගේ සහභාගිත්වයෙන් පැවැති මෙම සාකච්ඡාවේදී පාගමනේ සංවිධාන කටයුතු සහ ආරක්ෂාව පිළිබඳව දීර්ඝ ලෙස අවධානය යොමු වූ අතර, බුද්ධශාසන, මහජන ආරක්ෂක අමාත්යාංශ සහ ත්රිවිධ හමුදාවේ පූර්ණ සහයෝගය මේ සඳහා ලබාදීමට තීරණය කෙරිණි.
මෙම සාම පාගමන අප්රේල් 21 වන දින අනුරාධපුර ජය ශ්රී මහා බෝධීන් වහන්සේ අභියසින් ආරම්භ වීමට නියමිත අතර ඇමරිකානු සාම පාගමනට නායකත්වය දුන් පූජ්ය පඤ්ඤාකර ස්වාමීන් වහන්සේ ප්රමුඛ භික්ෂූන් වහන්සේලා 12 නමක් මේ සඳහා මෙරටට වැඩම කරති. අප්රේල් 22 වන දා දඹුල්ලෙන් ආරම්භ වන පාගමන නාඋල, මාතලේ, මහනුවර, කඩුගන්නාව, කෑගල්ල, යක්කල සහ කැලණිය හරහා ගමන් කර අප්රේල් 28 වන දා කොළඹ නිදහස් චතුරස්රය වෙත ළඟා වීමට සැලසුම් කර ඇත.
මෙම පාගමනේ විශේෂත්වයක් ලෙස අනුරාධපුරයෙන් ලබා ගන්නා ශ්රී මහා බෝධි අංකුරයක් පාගමනින් වැඩම කරවන අතර, වැඩසටහන අවසානයේ ජනාධිපති අනුර කුමාර දිසානායක මහතා විසින් එම බෝධි අංකුරය රාජ්යතාන්ත්රික මට්ටමින් මහා සංඝරත්නය වෙත නිල වශයෙන් භාර දීමට නියමිතය. සමස්ත වැඩසටහන පුරා භික්ෂූන් වහන්සේලාගේ දානමය කටයුතු, සනීපාරක්ෂක පහසුකම් සහ ආරක්ෂාව සැපයීම රජයේ මැදිහත් වීමෙන් සිදු කිරීමට මෙහිදී සියලු කටයුතු සම්පාදනය විය.
