මාතර, වැලිගම වැලිපිටිය සෞඛ්ය වෛද්ය නිලධාරි බලප්රදේශයේ සිදුකළ හදිසි පරීක්ෂාවකදී මහජන සෞඛ්යයට අහිතකර ලෙස පවත්වාගෙන ගිය හෝටල් දෙකක් ඇතුළු ව්යාපාරික ස්ථාන 15කට එරෙහිව නීතිමය ක්රියාමාර්ග ගැනීමට සෞඛ්ය බලධාරීන් පියවර ගෙන තිබේ. වැලිපිටිය, වරකපිටිය සහ දෙනිපිටිය යන ප්රදේශ කේන්ද්ර කරගනිමින් පසුගියදා රාත්රී කාලයේදී මෙම විශේෂ වැටලීම සිදුකර ඇත. එහිදී කල් ඉකුත් වූ ආහාර ද්රව්ය අලෙවිය, නිසි තොරතුරු නොමැතිව ආහාර ඇසුරුම් කිරීම සහ අවම සනීපාරක්ෂක ප්රමිතීන් පවා උල්ලංඝනය කරමින් පවත්වාගෙන ගිය ස්ථාන රැසක් නිලධාරීන්ගේ දැඩි පරීක්ෂාවට ලක්විය.
මෙම වැටලීමේදී අනාවරණය වූ කරුණු අනුව, කල් ඉකුත් වූ ආහාර ද්රව්ය විකිණීම සහ ප්රදර්ශනය කිරීම සම්බන්ධයෙන් වෙළඳසැල් 5ක් ද, නිසි ලේබල් නොමැතිව ආහාර ඇසුරුම් කර තිබූ වෙළඳසැල් 3ක් ද හඳුනාගෙන තිබේ. තවද, ලේබල්වල අනිවාර්යයෙන්ම තිබිය යුතු සීනි, ලුණු සහ මේදය දැක්වෙන වර්ණ සංඛ්යාත (Traffic light labeling) නොමැතිව ආහාර නිෂ්පාදනය කළ ස්ථාන 4ක් සහ අමු මස් හා මාළු සමඟ බීම පැකට් සහ අයිස්ක්රීම් වර්ග එකට ගබඩා කර තිබූ එක් ව්යාපාරික ස්ථානයකට ද එරෙහිව නඩු පැවරීමට නියමිතය. නියමිත උෂ්ණත්වය යටතේ යෝගට් ප්රවාහනය නොකිරීම ද මෙහිදී අනාවරණය වූ තවත් ප්රධාන අඩුපාඩුවකි.
වැඩබලන සෞඛ්ය වෛද්ය නිලධාරි පී.එච්. රණවීර මහත්මියගේ උපදෙස් පරිදි මහජන සෞඛ්ය පරීක්ෂකවරුන් වන සී.ඩී.ආර්. යාපා, එච්.එච්.එන්.එන්. කුමාර, තිළිණ සුභාග්ය, ශාවාන් රංගජීව සහ අසිත දිල්රුවන් යන නිලධාරීන් මෙම වැටලීමට එක්ව සිටියහ. පාරිභෝගික ජනතාවට ගුණාත්මක සහ පිරිසිදු ආහාර ලබාදීම තහවුරු කිරීම සඳහා මෙවැනි හදිසි වැටලීම් ඉදිරියටත් සිදුකරන බව වැලිපිටිය සෞඛ්ය වෛද්ය නිලධාරි කාර්යාලය අවධාරණය කරයි. විශේෂයෙන්ම රාත්රී කාලයේදී පවත්වාගෙන යනු ලබන ආපනශාලාවල පිරිසිදුකම පිළිබඳව බලධාරීන් නිරන්තර අවධානයෙන් පසුවේ.
