ප්රතිවාදී බ්රෙන්ට්ෆර්ඩ් කණ්ඩායම දඬුවම් පහර 5-3ක් ලෙස පරාජය කරමින් වසර 10කට පසු ප්රථම වතාවට එෆ්.ඒ කුසලාන (FA Cup) අර්ධ අවසන් පූර්ව වටයට සුදුසුකම් ලැබීමට වෙස්ට් හැම් යුනයිටඩ් කණ්ඩායම සමත් විය. අතිශය උද්යෝගිමත් තරගයකින් පසු ලබාගත් මෙම ජයග්රහණයත් සමඟ අර්ධ අවසන් පූර්ව වටයේදී ලීඩ්ස් යුනයිටඩ් කණ්ඩායම සමඟ සිය මව් ක්රීඩාංගණයේදී තරග වැදීමට ඔවුන්ට අවස්ථාව හිමිව තිබේ.
තරගයේ 19 වැනි මිනිත්තුවේදී ජැරඩ් බෝවන් වෙස්ට් හැම් කණ්ඩායම වෙනුවෙන් පළමු ගෝලය වාර්තා කළද, ඊට මිනිත්තු 8කට පසු ඊගෝර් තියාගෝ බ්රෙන්ට්ෆර්ඩ් වෙනුවෙන් ගෝලයක් ලබා ගනිමින් තරගය සම තත්ත්වයට පත් කළේය. අනතුරුව 34 වැනි මිනිත්තුවේදී හිමිවූ දඬුවම් පහරක් සාර්ථකව නිම කළ නායක බෝවන් වෙස්ට් හැම් කණ්ඩායමට යළිත් පෙරමුණ ගෙන දුන්නේය. තරගයේ ජයග්රහණය වෙස්ට් හැම් කණ්ඩායමට හිමිවනු ඇතැයි පෙනී ගියද, 80 වැනි මිනිත්තුවේදී බ්රෙන්ට්ෆර්ඩ් පිලේ තියාගෝ යළිත් දඬුවම් පහරක් සාර්ථක කරමින් තරගය අතිරේක කාලය දක්වා රැගෙන ගියේය.
අතිරේක කාලය තුළ දෙපිලටම ගෝල වාර්තා කිරීමට නොහැකි වූ අතර, බ්රෙන්ට්ෆර්ඩ් කණ්ඩායමේ ඩැන්ගෝ ක්වාටාරා (Dango Ouattara) එල්ල කළ දුර්වල ‘පැනෙන්කා’ (Panenka) දඬුවම් පහර වෙස්ට් හැම් ජයග්රහණයට මඟ පෑදීය. අවසානයේ කොන්ස්ටන්ටිනෝස් මැව්රොපානොස් (Konstantinos Mavropanos) තීරණාත්මක ජයග්රාහී දඬුවම් පහර එල්ල කරමින් වෙස්ට් හැම් කණ්ඩායම ඉදිරි වටයට රැගෙන ගියේය. රෙලගේෂන් තර්ජනයෙන් පීඩා විඳින වෙස්ට් හැම් කණ්ඩායමට මෙම ජයග්රහණය විශාල මානසික ශක්තියක් වනු ඇත.
