කවුඩුල්ල රක්ෂිතයේ සිට සෝමාවතිය රක්ෂිතය දක්වා දුම්රිය මාර්ගය ඔස්සේ ගමන් කරමින් සිටි වන අලියෙකු, කොළඹ කොටුව සිට ත්රිකුණාමලය බලා ධාවනය වූ රාත්රී තැපැල් දුම්රියේ ගැටීමෙන් ඊයේ (17) අලුයම අවාසනාවන්ත ලෙස මියගොස් තිබේ. කන්තලේ සහ ගල්ඔය අතර කිතුල්උතුව 152 කණුව අසලදී මෙම අනතුර සිදුව ඇති බව වාර්තා වේ.
වනජීවී නිලධාරීන් පවසන පරිදි, අලියා දුම්රිය එන්ජිමේ සෘජුවම ගැටී ඇති අතර සත්ත්වයාගේ සිරුරේ කොටස් එන්ජිමේ සිරවීම හේතුවෙන් දුම්රිය පීලි පැනීමකට ද ලක්ව ඇත. මෙම වන අලියා නිරන්තරයෙන් කවුඩුල්ල සහ සෝමාවතිය රක්ෂිත අතර සංක්රමණය වන සත්ත්වයෙකු බවට හඳුනාගෙන තිබේ. පීලි පැනීම හේතුවෙන් ත්රිකුණාමලය මාර්ගයේ දුම්රිය ධාවනයට ද තාවකාලිකව බාධා එල්ල වූ අතර, දුම්රිය සේවකයින් සහ වනජීවී නිලධාරීන් එක්ව මාර්ගය යථා තත්ත්වයට පත් කිරීමට පියවර ගෙන ඇත.
මෙම කලාපය අලි පාලම් හෝ වේග සීමා පවතින කලාපයක් ද යන්න පිළිබඳව බලධාරීන්ගේ අවධානය යොමු වී ඇති අතර, වන අලින් දුම්රියට බිලිවීම වැළැක්වීමට තවමත් ස්ථිර විසඳුමක් නොමැති වීම පිළිබඳව පරිසරවේදීහු සිය කණගාටුව පළ කරති.
