බකමූණ සහ කළුන්දෑව ප්රදේශවල අලි වැට රාජකාරියේ යෙදී සිටිය යුතු වනජීවී දෙපාර්තමේන්තුවේ සේවකයන් එකොළොස් දෙනෙකු, අඩවි සහකාරවරයෙකුගේ හිතවත් කාන්තාවකගේ ගෙවත්තක් පිරිසිදු කිරීමට යොදවා සිටියදී අනාවරණය වී තිබේ. අනතුරට පත් වූ මුවකු බේරා ගැනීමට මැදිහත් වන ලෙස මාධ්යවේදීන් කළ ඉල්ලීමකදී, තමන් පිරිසක් සමඟ වනය මැද හදිසි රාජකාරියක සිටින බව පවසා අඩවි සහකාරවරයා මගහැර ඇතත්, පසුව සිදුකළ සොයා බැලීමකදී මෙම වංචාව හෙළි විය.
දඹුල්ල, කපුවත්ත ප්රදේශයේ පිහිටි පාළුවට ගිය ඉඩමක් පිරිසිදු කිරීමට අලි වැට සේවකයන් සහ තණකොළ කපන යන්ත්ර පවා යොදාගෙන තිබූ අතර, අදාළ නිලධාරියා පවසා ඇත්තේ එම පිරිස නිවාඩු ලබා සිටි අය බවයි. කෙසේ වෙතත්, වනජීවී අධ්යක්ෂ ජනරාල්වරයාගේ උපදෙස් පරිදි මේ වන විටත් අදාළ අඩවි සහකාරවරයාට එරෙහිව විශේෂ විමර්ශනයක් ආරම්භ කර ඇති බව ඇලහැර අඩවි ආරක්ෂක නලින් ජයසූරිය මහතා තහවුරු කළේය.
