ශ්රී ලංකා විදේශ සේවා නියුක්ති කාර්යාංශයේ වලංගු බලපත්රයක් නොමැතිව රුමේනියාවේ රැකියා ලබාදෙන බව පවසා රුපියල් එක් කෝටි හැට ලක්ෂයකට (රු. 16,000,000) ආසන්න මුදලක් වංචා කර සැඟවී සිටි කාන්තාවක් කාර්යාංශයේ විශේෂ විමර්ශන ඒකකය විසින් අත්අඩංගුවට ගෙන තිබේ. මීට පෙර රුමේනියාවේ සේවය කර ඇති මෙම කාන්තාව, එහි පවතින සම්බන්ධතා උපයෝගී කරගනිමින් පුද්ගලයන් 15 දෙනෙකුගෙන් පමණ මෙලෙස මුදල් ලබාගෙන ඇති බවට පැමිණිලි ලැබී තිබුණි.
සැකකාරිය අත්අඩංගුවට ගැනීම සඳහා පිළියන්දල, වැල්ලම්පිටිය, කොළොන්නාව සහ කහතුඩුව යන ප්රදේශවල අවස්ථා කිහිපයකදීම වැටලීම් සිදු කළ ද, ඇය ඉතා සූක්ෂ්ම ලෙස නිලධාරීන් මගහරිමින් පලා ගොස් තිබුණි. මෙම ජාවාරමට සහය දුන් තවත් පුද්ගලයන් සිව්දෙනෙකු මීට පෙර අත්අඩංගුවට ගෙන තිබූ අතර, අවසානයේ විමර්ශන නිලධාරීන් විසින් උපාය දූතයෙකු යොදාගනිමින් ඇයව කොටු කරගෙන ඇත. උපාය දූතයාට රැකියා ගිවිසුම් අත්සන් කිරීම සඳහා කොළොන්නාව ප්රදේශයේ නීතිඥවරයෙකුගේ නිවසකට පැමිණි අවස්ථාවේදී ඇයව අත්අඩංගුවට පත් විය.
අත්අඩංගුවට ගත් සැකකාරිය කොළඹ අලුත්කඩේ අංක 05 අධිකරණය වෙත ඉදිරිපත් කිරීමෙන් අනතුරුව ලබන මාර්තු මස 03 වනදා දක්වා රක්ෂිත බන්ධනාගාර ගත කිරීමට මහේස්ත්රාත්වරයා නියෝග කළේය. විදේශ රැකියා ලබාගැනීමේදී ලියාපදිංචි බලපත්රලාභී නියෝජිත ආයතන හරහා පමණක් කටයුතු කරන ලෙසත්, පුද්ගලිකව මුදල් ලබාදීමෙන් වළකින ලෙසත් විදේශ සේවා නියුක්ති කාර්යාංශය මහජනතාවගෙන් නැවතත් ඉල්ලා සිටියි.
