මැදපෙරදිග කලාපයේ පවතින ගැටුම්කාරී තත්ත්වය හේතුවෙන් ගෝලීය අර්බුදයක් නිර්මාණය වී තිබුණද, ශ්රී ලංකාව තුළ දැනට නිවසේ සිට වැඩ කිරීමේ (Work from Home) ක්රමවේදයක් අවශ්ය නොවන බව වෙළඳ, වාණිජ, ආහාර සුරක්ෂිතතාව සහ සමුපකාර සංවර්ධන අමාත්ය වසන්ත සමරසිංහ මහතා ප්රකාශ කළේය. පසුගිය බ්රහස්පතින්දා (12) පැවැති සාකච්ඡාවකදී අමාත්යවරයා මේ බව සඳහන් කළේය.
රජය මේ වන විට පවතින තත්ත්වය පිළිබඳව ඉතා සමීපව නිරීක්ෂණය කරමින් සිටින බවත්, ඉදිරියේදී තත්ත්වය වඩාත් බරපතළ වුවහොත් පමණක් රාජ්ය සහ පෞද්ගලික අංශයේ සේවකයින් සඳහා නිවසේ සිට වැඩ කිරීමේ විකල්පය හඳුන්වා දීමට සලකා බලන බවත් ඔහු පැහැදිලි කළේය.
මැදපෙරදිග ගැටුම් හේතුවෙන් ගෝලීය සැපයුම් දාමයන්ට බාධා එල්ල වී ඇති අතර, නාවික ප්රවාහන ගාස්තු ඉහළ යාම හේතුවෙන් ජාත්යන්තර වෙළඳපොළේ අත්යවශ්ය භාණ්ඩවල මිල ඉහළ ගොස් ඇති බව අමාත්යවරයා පෙන්වා දුන්නේය. ලෝක වෙළඳපොළේ තෙල් සහ ගෑස් මිල ඉහළ යාම මෙරටටද බලපාන බවත්, දැනටමත් දේශීයව ඉන්ධන මිල සංශෝධනය කර ඇති අතර අප්රේල් මාසයේදී ඉහළ පිරිවැයක් සහිත නව තොග ලැබීමත් සමඟ මිල තවදුරටත් ඉහළ යා හැකි බවටත් ඔහු අනතුරු ඇඟවීය.
එසේම ඇතැම් පෞද්ගලික ගෑස් සමාගම් මිල ඉහළ දැමීමට උත්සාහ කළද, රජය මැදිහත් වී මිල ස්ථාවරව පවත්වා ගැනීමට පියවර ගනිමින් සිටින බවද ඔහු පැවසීය. ගෝලීය අර්බුද හමුවේ කලබල වී අනවශ්ය ලෙස භාණ්ඩ රැස් කිරීමෙන් (Panic Buying) වළකින ලෙසත්, සම්පත් අරපිරිමැස්මෙන් පරිහරණය කරන ලෙසත් අමාත්යවරයා ජනතාවගෙන් ඉල්ලා සිටියේය.
