ඕස්ට්රේලියාවේ ජාතික විද්යා ආයතනය වන CSIRO හි පර්යේෂකයන් කණ්ඩායමක් විසින් ලොව ප්රථම ‘ක්වොන්ටම් බැටරි’ මූලාකෘතිය සාර්ථකව නිපදවා ඇති බව නිවේදනය කර ඇත. 2013 වසරේදී මුලින්ම සෛද්ධාන්තිකව ඉදිරිපත් කෙරුණු මෙම සංකල්පය, ක්වොන්ටම් යාන්ත්ර විද්යාවේ මූලධර්ම භාවිතයෙන් ශක්තිය ගබඩා කරන අතර සාම්ප්රදායික බැටරිවලට වඩා අතිශය කාර්යක්ෂම සහ වේගවත් ආරෝපණ හැකියාවකින් යුක්ත වේ. මෙම නව නිපැයුම මඟින් බැටරියක් ආරෝපණය කිරීම, ශක්තිය ගබඩා කිරීම සහ නැවත ශක්තිය මුදා හැරීම යන සම්පූර්ණ ක්රියාවලියම ප්රථම වරට නිරූපණය කර තිබේ.
සාම්ප්රදායික බැටරිවල ප්රමාණය විශාල වන විට ආරෝපණය වීමට ගතවන කාලය ද වැඩි වන නමුත්, ක්වොන්ටම් බැටරි සතු විශේෂත්වය වන්නේ එහි ප්රමාණය විශාල වන විට ආරෝපණය වීමට ගතවන කාලය අඩු වීමයි. මෙහි මූලාකෘතිය ආරෝපණය කිරීම සඳහා ලේසර් කිරණ භාවිත කර ඇති අතර ඒ සඳහා ගතවී ඇත්තේ සිතාගත නොහැකි තරම් කෙටි කාලයක් වන ෆෙම්ටෝ තත්පර (තත්පරයකින් කෝටි ප්රකෝටි වාරයකින් පංගුවක්) කිහිපයක් පමණි. දැනට මෙම බැටරියට ශක්තිය ගබඩා කර තබා ගත හැක්කේ නැනෝ තත්පර කිහිපයක් වැනි ඉතා කෙටි කාලයක් වුවද, පර්යේෂකයන්ගේ මීළඟ ඉලක්කය වන්නේ එම කාලය දීර්ඝ කිරීමයි.
මෙම තාක්ෂණය අනාගතයේදී ක්වොන්ටම් පරිගණක බල ගැන්වීමට මෙන්ම ජංගම දුරකථන සහ විද්යුත් වාහන ඉතා වේගයෙන් ආරෝපණය කිරීමට ද යොදාගත හැකි වනු ඇතැයි අපේක්ෂා කෙරේ. විශේෂයෙන්ම පියාසර කරමින් පවතින ඩ්රෝන යානා හෝ ධාවනය වන වාහන රැහැන් රහිතව ආරෝපණය කිරීමේ හැකියාව මෙහි ඇති තවත් සුවිශේෂී වාසියකි. මෙම සොයාගැනීම බැටරි තාක්ෂණයේ දැවැන්ත පිම්මක් ලෙස සැලකෙන අතර, එය ඉදිරි වසර කිහිපය තුළ බලශක්ති ගබඩා කිරීමේ ක්රමවේදයන් සම්පූර්ණයෙන්ම වෙනස් කිරීමට සමත් වනු ඇත.
