සමාජ මාධ්ය ක්ෂේත්රයේ දැවැන්තයෙකු වන X (ට්විටර්) වේදිකාව මගින් නිර්මාණකරුවන් (Creators) වෙත ගෙවීම් කිරීම සඳහා හඳුන්වා දීමට සැලසුම් කළ නව ප්රතිපත්තිය ලෝක ව්යාප්ත පරිශීලක විවේචන හමුවේ තාවකාලිකව අත්හිටුවීමට එහි හිමිකරු ඉලෝන් මස්ක් (Elon Musk) පියවර ගෙන තිබේ. මෙම නව නීති රීති මාලාව මෙම බ්රහස්පතින්දා (2026 මාර්තු 26) සිට ක්රියාත්මක වීමට නියමිතව තිබුණි. මෙමගින් නිර්මාණකරුවෙකු උපයන ආදායම තීරණය කිරීමේදී, ඔවුන් නියෝජනය කරන රටේ හෝ කලාපයේ පරිශීලකයින් දක්වන දායකත්වය (Local Engagement) කෙරෙහි වැඩි අවධානයක් යොමු කිරීමට සැලසුම් කර තිබුණි.
X හි නිෂ්පාදන අංශ ප්රධානී නිකිතා බියර් (Nikita Bier) පවසා තිබුණේ, මෙම වෙනස සිදු කිරීමට මූලික හේතුව වූයේ ඇමරිකාව හෝ ජපානය වැනි පරිශීලකයින් වැඩි වශයෙන් සිටින රටවල දේශපාලනය හෝ අනෙකුත් කරුණු පිළිබඳව වෙනත් රටවල සිටින නිර්මාණකරුවන් අනවශ්ය ලෙස තොරතුරු පළ කරමින් (Gaming the system) ආදායම් ඉපයීමට උත්සාහ කිරීම වැළැක්වීම බවයි. විශේෂයෙන්ම ඇමරිකානු දේශපාලනය සම්බන්ධයෙන් ඇමරිකාවෙන් බැහැරව සිටින පරිශීලකයින් විශාල වශයෙන් අන්තර්ගතයන් නිර්මාණය කරන බව ඔවුන් නිරීක්ෂණය කර තිබුණි.
කෙසේ වෙතත්, මෙම යෝජිත වෙනසත් සමඟ ලොව පුරා සිටින නිර්මාණකරුවන්ගෙන් දැඩි විරෝධයක් එල්ල විය. ඔවුන් පෙන්වා දුන්නේ තමන් දේශපාලනයෙන් ඔබ්බට ගිය විවිධ මාතෘකා ඔස්සේ අන්තර්ගතයන් නිර්මාණය කරන බවත්, ඇතැම් රටවල සිටින පරිශීලකයින් සංඛ්යාව ඉතා සීමිත බැවින් දේශීය දායකත්වය මත පමණක් ආදායම තීරණය කිරීම අසාධාරණ බවත්ය. මෙම විවේචන සලකා බැලූ ඉලෝන් මස්ක්, මේ පිළිබඳව තවදුරටත් අධ්යයනය කරන තෙක් නව ප්රතිපත්තිය ක්රියාත්මක කිරීම අත්හිටුවන බවට X පණිවිඩයක් මගින් තහවුරු කළේය.
