මෙවර යල කන්නයට අවශ්ය පොහොර බෙදාහැරීමේ කටයුතු රජයේ සෘජු මැදිහත්වීමෙන්, විශේෂ කෝටා ක්රමවේදයක් යටතේ සිදු කිරීමට කෘෂිකර්ම අමාත්යාංශය තීරණය කර තිබේ. මැදපෙරදිග කලාපයේ පවතින අස්ථාවර වාතාවරණය හේතුවෙන් ජාත්යන්තර පොහොර සැපයුම් ජාලයට එල්ල විය හැකි බාධා සැලකිල්ලට ගනිමින් ගොවි ජනතාවට අඛණ්ඩව පොහොර ලබාදීම සහතික කිරීම මෙහි මූලික අරමුණයි. ඒ අනුව, වී වගාව සඳහා අවශ්ය පොහොර නිකුත් කිරීම රජයේ ගොවිජන සේවා මධ්යස්ථාන හරහා පමණක් සුවිශේෂී ලෙස සිදු කිරීමට නියමිතව ඇත.
පොහොර තොග සඟවා තබා ගනිමින් කෘතිම හිඟයක් මවාපාමින් වැඩි මිලට අලෙවි කරන ජාවාරම්කරුවන් මැඩපැවැත්වීම සඳහා ජනාධිපති අනුර කුමාර දිසානායක මහතා විසින් අදාළ බලධාරීන්ට උපදෙස් ලබා දී තිබේ. මේ යටතේ දිස්ත්රික් මට්ටමින් පොහොර බෙදාහැරීමේ යාන්ත්රණය විධිමත් කිරීමටත්, උපායමාර්ගික සංචිතයක් ලෙස පොහොර තොග පවත්වා ගැනීමටත් පියවර ගෙන ඇත. වංචනික ක්රියාවලින් තොරව නියමිත මිලට ගොවීන්ට පොහොර ලැබීම සහතික කිරීම සඳහා වන මෙම වැඩපිළිවෙළ යටතේ යුරියා පොහොර මිටියක් රුපියල් 9,900ත් 10,200ත් අතර මිලකට අලෙවි කිරීමට කටයුතු යොදා තිබේ.
ගොවි ජනතාවගේ පහසුව වෙනුවෙන් රජයේ ගොවිජන සේවා මධ්යස්ථාන නිවාඩු දිනවල පවා විවෘතව තැබීමට කටයුතු කරන ලෙස ගොවිජන සංවර්ධන කොමසාරිස් ජනරාල්වරයා දැනුම් දී ඇත. යල කන්නයේ වගා කටයුතු දැනටමත් ආරම්භ කර ඇති ප්රදේශවල ගොවීන්ට ප්රමාදයකින් තොරව මෙම කෝටා ක්රමය යටතේ පොහොර ලබාගත හැකිය. රජය අවධාරණය කර සිටින්නේ ජාත්යන්තර වෙළඳපොළේ මිල ගණන් ඉහළ ගියද, දේශීය ගොවියා ආරක්ෂා කරගැනීම සඳහා විකල්ප මාර්ග ඔස්සේ පොහොර ආනයනය කරමින් මෙම සැපයුම් ජාලය බිඳවැටීමට ඉඩ නොදෙන බවයි.
