යාපනය සහ කොළඹ අතර ගමන් ගන්නා දෙස් විදෙස් සංචාරකයින්ගේ මෙන්ම රියදුරන්ගේ පහසුව උදෙසා සියලු පහසුකම්වලින් සමන්විත “සංහිඳියාවේ නැවතුම” සේවා මධ්යස්ථානය ඊයේ (10) ජනතා අයිතියට පත් කෙරුණා. වවුනියාව දකුණ ප්රාදේශීය ලේකම් කොට්ඨාසයේ ඉරට්ටපෙරියකුලම් ප්රදේශයේ, යාපනය – කොළඹ ප්රධාන මාර්ගයට මුහුණලා පිහිටි මෙම මධ්යස්ථානය ග්රාමීය සංවර්ධන, සමාජ ආරක්ෂණ හා ප්රජා සවිබලගැන්වීම් අමාත්යාංශයේ රුපියල් මිලියන 15 ක ප්රතිපාදන මත ඉදි කර තිබෙනවා. අමාත්ය මහාචාර්ය උපාලි පන්නිල මහතාගේ ප්රධානත්වයෙන් විවෘත වූ මෙම ව්යාපෘතිය හරහා ප්රජා සවිබලගැන්වීම් ඉලක්ක කර ගනිමින් ප්රතිලාභීන් 14 දෙනෙකුට සෘජු ජීවනෝපාය අවස්ථා ද, තවත් 30 දෙනෙකුට පමණ වක්ර ආදායම් මාර්ග ද උදා කර දී තිබීම විශේෂත්වයක්.
මෙම සේවා මධ්යස්ථානය මගින් ගමන් වෙහෙස නිවා ගැනීමට අවශ්ය පහසුකම්වලට අමතරව, උතුරු පළාතට ආවේණික නිෂ්පාදන, විසිතුරු භාණ්ඩ, ප්රණීත ආහාර පාන සහ උසස් මට්ටමේ සනීපාරක්ෂක සේවා සපයනු ලබනවා. දුරබැහැර ගමන් ගන්නා පිරිස්වලට එකම ස්ථානයකදී විවේකය සහ අවශ්ය ද්රව්ය මිලදී ගැනීමේ අවස්ථාව සලසා දීම මෙහි ප්රධාන අරමුණයි. වයඹ පළාත් සභාවේ ව්යාපෘති ප්රමාදයන් පිළිබඳව රජයේ අවධානය යොමු වී ඇති මෙවන් වකවානුවක, නියමිත පරිදි නිම කර ජනතා අයිතියට පත් කළ මෙවැනි ව්යාපෘති ග්රාමීය ආර්ථිකය ශක්තිමත් කිරීමට මනා පිටුවහලක් වනු ඇතැයි අපේක්ෂා කෙරෙනවා.
