මැදපෙරදිග කලාපයේ පවතින ගැටුම්කාරී වාතාවරණය තවදුරටත් උග්ර කරමින්, ලෝක ආර්ථිකයේ නාඩි වැටිය බඳු තවත් ප්රධාන සාගරික ඉන්ධන සැපයුම් මාර්ගයක් අවහිර කරන බවට යේමනයේ හුති සටන්කාමීන් අනතුරු අඟවා තිබේ. ඊශ්රායලයේ සංවේදී හමුදා මධ්යස්ථාන ඉලක්ක කරගනිමින් එල්ල කළ මිසයිල ප්රහාරයකින් අනතුරුව ඔවුන් මෙම ප්රකාශය සිදු කර ඇති අතර, ඉරානය විසින් දැනටමත් අවහිර කර ඇති හෝමුස් සමුද්ර සන්ධියට විකල්පයක් ලෙස භාවිත කරන රතු මුහුදේ ඉන්ධන ප්රවාහන මාර්ගය වසා දැමීම තම මීළඟ විකල්පය බව හුති හමුදා නායකයෝ පවසති. මෙමඟින් ලෝක වෙළෙඳපොළේ තෙල් සහ ගෑස් මිල ගණන් අතිවිශාල ලෙස ඉහළ යාමේ අවදානමක් මතුව ඇත.
අරාබි බසින් ‘කඳුළු දොරටුව’ (Gate of Tears) ලෙස හැඳින්වෙන බැබ් අල්-මැන්ඩෙබ් (Bab al-Mandeb) සමුද්ර සන්ධිය සැතපුම් 18ක් පමණ පළලැති ඉතා පටු මුහුදු මාර්ගයක් වන අතර, එය රතු මුහුද සහ ඒඩන් බොක්ක යා කරමින් සුේස ඇළ දෙසට යන මුහුදු ගමනාගමනය පාලනය කරයි. ලෝක සාගරික වෙළෙඳාමෙන් 10%ක් සහ බොරතෙල් ප්රවාහනයෙන් 10%ක් මෙම මාර්ගය හරහා සිදු වේ. හෝමුස් සහ බැබ් අල්-මැන්ඩෙබ් යන සමුද්ර සන්ධි ද්විත්වයම අවහිර වුවහොත්, ගෝලීය සැපයුම් දාමයන් සම්පූර්ණයෙන්ම බිඳ වැටී බලශක්ති වෙළෙඳපොළ දැඩි අර්බුදයකට ලක් වනු ඇති බව ආර්ථික විශ්ලේෂකයෝ අනාවැකි පළ කරති.
වසර පහක් පුරා ඇදී යන මෙම යුද්ධය හමුවේ සෞදි අරාබියේ ඇමරිකානු හමුදා කඳවුරකට එල්ල වූ ප්රහාරයකින් සෙබළුන් 24 දෙනෙකු තුවාල ලබා ඇති අතර, බ්රිතාන්යය ඇතුළු රටවල් රැසක ඉන්ධන අර්බුදයක් ඇතිවීමේ පෙරනිමිති පහළ වී තිබේ. හුති ප්රකාශක බ්රිගේඩියර් ජෙනරාල් යාහ්යා සාරි පවසන්නේ ඊශ්රායලයට සහ ඇමරිකාවට එරෙහිව සියලු පෙරමුණු ඔස්සේ එල්ල කරන ප්රහාර නතර කරන්නේ නැති බවයි. මේ අතර, එක්සත් අරාබි එමීර් රාජ්යයේ පිහිටි යුක්රේන විරෝධී ඩ්රෝන පද්ධති ගබඩාවක් විනාශ කළ බවට ද ඉරානය පවසා ඇති අතර, යුක්රේනය සිය මිතුරන්ගේ සතුරෙකු ලෙස සලකා ඉලක්ක කරන බව ඔවුන් වැඩිදුරටත් අවධාරණය කර ඇත.
