නවදිල්ලියේ භාරත් මණ්ඩපම් පරිශ්රයේ පැවැත්වෙන 2026 ඉන්දීය AI බලපෑම් සමුළුව (India AI Impact Summit 2026) අතරතුර ඉන්දීය අග්රාමාත්ය නරේන්ද්ර මෝදි මහතාට එරෙහිව ඉන්දීය තරුණ කොංග්රස් (IYCP) ක්රියාකාරීන් පිරිසක් අද (20) උඩුකය නිරාවරණය කරමින් විශේෂ විරෝධතාවයක නිරත විය. විරෝධතාකරුවන් ශාලාව තුළට ඇතුළු වී තම ටී-ෂර්ට් ගලවා අතැතිව සටන් පාඨ කියමින් ගමන් කරන අයුරු දැක්වෙන වීඩියෝවක් මේ වන විට සමාජ මාධ්ය ඔස්සේ දැඩි ලෙස ප්රචාරය වෙමින් පවතී.
දිල්ලි පොලිසියේ අතිරේක කොමසාරිස් දේවේෂ් මහ්ලා මහතාට අනුව, මෙම විරෝධතාකරුවන් පිරිස සමුළුව සඳහා අන්තර්ජාලය හරහා නිල වශයෙන් ලියාපදිංචි වී තිබේ. ඔවුන් පරිශ්රයට ඇතුළු වන අවස්ථාවේදී “PM is compromised” සහ “Epstein Files” වැනි මතභේදාත්මක වැකි සහිත ටී-ෂර්ට් ඇඳ සිට ඇති අතර, ඒවා ආවරණය වන පරිදි ස්වීටර් සහ ජැකට් හැඳ සිටීම නිසා ආරක්ෂක අංශවලට ඔවුන් හඳුනාගැනීමට නොහැකි වී ඇත. 5 වන ශාලාව (Hall No. 5) අසලදී ඔවුන් තම උඩුකය වැස්ම ඉවත් කර විරෝධතාව ආරම්භ කර තිබේ.
සිද්ධිය සම්බන්ධයෙන් පුද්ගලයන් 10 දෙනෙකු පමණ අත්අඩංගුවට ගෙන තිලක් මාර්ග් පොලිස් ස්ථානය වෙත රැගෙන ගොස් ඇති බව පොලිසිය තහවුරු කරයි. සාමය කඩකිරීම සහ නීතිය උල්ලංඝනය කිරීම සම්බන්ධයෙන් ඔවුන්ට එරෙහිව නීතිමය පියවර ගැනීමට නියමිතය. මෙම ආරක්ෂක විවරය හමුවේ මින් ඉදිරියට සමුළු ශාලා තුළ ආරක්ෂාව තවදුරටත් දැඩි කිරීමට බලධාරීන් තීරණය කර ඇත.
ඉන්දියාව සහ ඇමරිකාව අතර ඇති කරගත් වෙළෙඳ ගිවිසුම මගින් ඉන්දීය ගොවීන්ට සහ තරුණ පරපුරට අසාධාරණයක් සිදුවන බවත්, අග්රාමාත්යවරයා රටේ අනන්යතාවය පාවා දී ඇති බවත් විරෝධතාකරුවෝ චෝදනා කරති. කෙසේ වෙතත්, භාරතීය ජනතා පක්ෂය (BJP) මෙම ක්රියාව දැඩි ලෙස හෙළා දකිමින් ප්රකාශ කර ඇත්තේ මෙය ඉන්දියාවේ ජාත්යන්තර ප්රතිරූපයට හානි කිරීම සඳහා සිදුකළ “සංවිධානාත්මක කුමන්ත්රණයක්” බවයි.
