යුක්රේනය රුසියාව විසින් ඉරාන ෂහීඩ් (Shahed) ඩ්රෝන යානා අත්හදා බලන පරීක්ෂණාගාරයක් ලෙස භාවිත කළ බවත්, එම අත්දැකීම් උපයෝගී කරගනිමින් රුසියාව විසින් දැන් ඉරාන ඩ්රෝන තාක්ෂණය තවදුරටත් දියුණු කර ඇති බවත් යුක්රේන ජනාධිපති වොලොඩිමියර් සෙලෙන්ස්කි පවසයි. ජෙරුසලම් පෝස්ට් (The Jerusalem Post) පුවත්පත සමඟ පැවැති සම්මුඛ සාකච්ඡාවකදී ඔහු අවධාරණය කළේ, වසර ගණනාවක් පුරා යුක්රේන සිවිල් වැසියන් ඉලක්ක කර ගනිමින් එල්ල කළ ප්රහාර හරහා මෙම ඩ්රෝන යානාවල තාක්ෂණය ඔපමට්ටම් කර ඇති බවයි. දැන් එම තර්ජනයම ඉශ්රායලය, ගල්ෆ් කලාපයේ රටවල් සහ ඇමරිකානු හමුදාවන් වෙත එල්ල වී ඇති බව ඔහු පෙන්වා දුන්නේය.
මෙම හමුදාමය සබඳතාවයේදී ඉරානය විසින් රුසියාවට ඩ්රෝන යානා ලබා දීමට අමතරව, ඒවා රුසියාව තුළම නිෂ්පාදනය කිරීමට අවශ්ය බලපත්ර සහ කර්මාන්තශාලා දෙකක් ඉදිකිරීමට ද සහාය වී ඇති බව සෙලෙන්ස්කි අනාවරණය කළේය. ඊට ප්රතිකෘතයක් ලෙස රුසියාව විසින් ඉරානය වෙත නවීන තාක්ෂණික දැනුම සහ උපාංග ලබා දෙන බවට සාක්ෂි හමුවී ඇති අතර, මැදපෙරදිග රටකින් විනාශ කරන ලද ෂහීඩ් ඩ්රෝන යානයක තිබී රුසියානු උපාංග හමුවීම ඊට කදිම උදාහරණයක් බව ඔහු සඳහන් කළේය. රුසියාව දැන් මිසයිල නිෂ්පාදනය වෙනුවට ඉතා අඩු පිරිවැයකින් නිෂ්පාදනය කළ හැකි මෙවැනි ඩ්රෝන යානා ලක්ෂ සංඛ්යාත ප්රමාණයක් නිපදවීමට යොමු වී ඇති බව ද ඔහු පැවසීය.
ඉශ්රායල අග්රාමාත්ය බෙන්ජමින් නෙතන්යාහු සමඟ සාකච්ඡා කිරීමට තමන් සූදානම් බවත්, “ඔහුට අවශ්ය දේ මා සතුව ඇති අතර මට අවශ්ය දේ ඔහු සතුව ඇති” බවත් සෙලෙන්ස්කි මෙහිදී පවසා තිබේ. විශේෂයෙන්ම ගුවන් ආරක්ෂණ පද්ධති (Air Defense) සම්බන්ධයෙන් යුක්රේනය සතු විශේෂඥ දැනුම අනෙකුත් රටවල් සමඟ බෙදා ගැනීමට මේ වන විටත් විශේෂඥ කණ්ඩායම් තුනක් යොදවා ඇති බව ඔහු වැඩිදුරටත් ප්රකාශ කළේය. රුසියාව විසින් බලශක්ති අලෙවියෙන් ලබන ආදායම මෙලෙස ආයුධ නිෂ්පාදනයට යොදවන බැවින්, රුසියාවට එරෙහි සම්බාධක ලිහිල් කිරීම ලෝකයටම තර්ජනයක් වනු ඇති බවට ද ඔහු අනතුරු ඇඟවීමක් කළේය.
