අදානි ග්‍රීන් එනර්ජි සමාගම ශ්‍රී ලංකාවෙන් තම සුළං බලශක්ති ව්‍යාපෘතිය ඉවත් කර ගැනීමට තීරණය කිරීම සම්බන්ධයෙන් ආන්දෝලනාත්මක තත්වයක් ඇතිව තිබෙනවා.
ඉන්දියාව සහ ශ්‍රී ලංකාව අතර රාජ්‍ය තාන්ත්‍රික ගැටුමක් ඇති වීම දක්වා මෙම ප්‍රශ්නය ඇදී යා හැකි බවයි මත පළවෙන්නේ.
ශ්‍රී ලංකාවේ මන්නාරම සහ පූනරින්හි මෙගාවොට් 484 ක සුළං බලාගාර සහ ඒ ආශ්‍රිත සම්ප්‍රේෂණ පද්ධතියක් ඉදිකිරීම මෙරට බලශක්ති ක්ෂේත්‍රය සම්බන්ධයෙන් දැවැන්ත පියවරක් බවට විවාදයක් නැහැ.
ශ්‍රී ලංකාවේ දකුණු ප්‍රදේශය වෙත විදුලිය රැගෙන යාම සඳහා අතිරේක සම්ප්‍රේෂණ ජාල පුළුල් කිරීම මෙන්ම, අනාගතයේදී ඉන්දියානු විදුල බල පද්ධතිය හා සම්බන්ධ කිරීමේ අභිප්‍රායන්ද සහිත අති විශාල ව්‍යාපෘතියක් ලෙස අදානි ග්‍රීන් එනර්ජි සමාගමේ සුළං බලශක්ති ව්‍යාපෘතිය හැඳින්විය හැකියි.මෙය ඇමරිකානු ඩොලර් බිලියන 1 ක දැවැන්ත ආයෝජනයක්.
මෙම ව්‍යාපෘතිය මෙරටට ලැබෙන්නේ රජයේ අවශ්‍යතාවය මත ටෙන්ඩර් කැඳවීමක් මඟින් නොවේ. එය ඉන්දියානු රජයේ ඉල්ලීමක්.
එම තත්වයන් මත විවිධ අවස්ථාවන්වලදීමෙම ව්‍යාපෘතිය ඉන්දියානු රජයේ කලාපීය භූ දේශපාලනික වුවමනා පදනම් කරගෙන මෙරට බලෙන් පැටවූ ව්‍යාපෘතියක් බවටත් විවේචන එල්ල වුණා.
අදානි ග්‍රීන් එනර්ජි සමාගමේ ප්‍රධානී ගෞතම් අදානි සහ ඉන්දීය අගමැති නරේන්ද්‍ර මෝදි අතර සමීප සම්බන්ධතා පවතින බැවින් මේ හේතුවෙන් මෙම ඉවත් වීම ඉන්දීය අගමැතිවරයා පවා කනස්සල්ලට පත් කරන්නක් විය හැකි බවත් විචාරකයින් මත පල කරනවා.
අදාළ ව්‍යාපෘතිය සඳහා අවබෝධතා ගිවිසුමකට එළැඹීමට කැබිනට් අනුමැතිය හිමි වුණේ ගෝඨාභය රාජපක්ෂ සමයේදී.
නමුත් මෙම ගනුදෙනුව පිළිබඳව විනිවිධ භාවයක් නොපැවැතීම ගැටලුවක්ව පවතී අතර පාරිසරික තත්වයන් හේතුවෙන් ඊට එරෙහිව අධිකරණ ක්‍රියා මාර්ග පවා ගෙන තිබුණා.ඒ අනුවයි වත්මන් රජය මෙය සමාලෝචනයට පියවර ගැණුනේ.
කෙසේ වෙතත් අදානි සමාගම තම ඉවත් වීම ගැන කළ නිවේදනයේ, ව්‍යාපෘති යෝජනාව සම්බන්ධයෙන් සාකච්ඡා කිරීමට වත්මන් කැබිනට් මණ්ඩලය විසින් නැවත සාකච්ඡා කමිටුවක් සහ ව්‍යාපෘති කමිටුවක් පිහිටුවීම මත ශ්‍රී ලංකාවේ ස්වෛරී අයිතීන්ට ගරු කරමින් එම ව්‍යාපෘතියෙන් ඉවත් වීමට සිය සමාගම තීරණය කළ බව සඳහන් කරනවා.
එමෙන්ම ශ්‍රී ලංකාව වෙනුවෙන් සැමවිට ම තම සමාගම පෙනී සිටින බවත්, ලංකා රජය විසින් නැවතත් සංවර්ධන අවස්ථාවක් සඳහා සිදු කරන ඇරයුම් භාර ගැනීමට සූදානම් බවත් සඳහන් වෙනවා.
මේ අතර අදානි සමාගමේ තීරණයත් සමඟ මේ ගැන ඉන්දියානු රජයේ සහ ශ්‍රී ලංකා රජය අතර විශේෂ සාකච්ඡා මාලාවක් සිදු කිරීමට නියමිත බව ඇතැම් මාධ්‍ය වාර්තා පෙන්වා දෙනවා. ඒ අනුව මෙම ව්‍යාපෘතිය යළි ආරම්භ විය හැකි බවටද මත පළ වෙනවා.
කෙසේ වෙතත් අදානි ග්‍රීන් එනර්ජි සමාගම යනු දකුණු ආසියාවේ විශාලතම පුනර්ජනනීය බලශක්ති සමාගම මෙන්ම ලෝකයේ දෙවන විශාලතම සූර්ය බල පද්ධති සංවර්ධකයා වෙනවා. අදානි සමාගම ඉන්දියාවේ ගුජරාට් ප්‍රාන්තයේ ඉදිකරන ලද පුනර්ජනනීය බලශක්ති උද්‍යානය ඉදිරි වසර 05 තුළදී ලොව විශාලතම පුනර්ජනනීය බලශක්ති උත්පාදන උද්‍යානය බවට පත් වීමටත් නියමිතයි.
මෙම ගැටලුකාරි තත්වයන් දෙරට අතර රාජතාන්ත්‍රික අර්බුදයක් දක්වා ඔඩු දිවීමට පෙර විසඳාගැනීමටත්, ඉන්දියාව සහ ලංකාව අතර වන හවුල්කාරිත්ව එකඟතා සහ ඉන්දීය භූ දේශපාලනික වුවමනාවන්ට බාධාවක් නොවන කටයුතු කිරීමටත් වත්මන් රජය ක්‍රියා කල යුතු බව TTV නිවුස් අප අවධාරණය කරනවා.
