ශ්රී ලංකා ආයෝජන මණ්ඩලය (BOI) මෙකී 2026 වසර තුළ මෙරටට ඇමෙරිකානු ඩොලර් බිලියන 1.5ක සෘජු විදේශ ආයෝජන (FDI) ආකර්ෂණය කරගැනීමට ඉලක්ක කරන බව පවසයි.
ආයෝජන මණ්ඩලයේ සභාපති අර්ජුන හේරත් මහතා සඳහන් කළේ මෙවර ආයෝජන කළඹට සයිනොපෙක් (Sinopec) සමාගමේ තෙල් පිරිපහදු ව්යාපෘතිය, කුළුබඩු සහ කෘෂි සැකසුම් මධ්යස්ථාන, දත්ත මධ්යස්ථාන (Data Centres) මෙන්ම අන්තර්ජාලය පදනම් කරගත් විශේෂ ආර්ථික කලාප ඇතුළත් වන බවයි.
පසුගිය 2025 වසරේදී ශ්රී ලංකාව ඇමෙරිකානු ඩොලර් බිලියන 1.057ක සෘජු විදේශ ආයෝජන ප්රමාණයක් ලබාගෙන ඇති අතර, එම වසර තුළ සමාගම් 186ක් මෙරට ආයෝජනය සඳහා ඉදිරිපත් වී තිබේ.
ඉන් ආයෝජන ව්යාපෘති 146ක් ක්රියාත්මක වූ අතර ඒවායේ සමස්ත වටිනාකම ඇමෙරිකානු ඩොලර් බිලියන 1.906ක් පමණ වේ. මෙම ව්යාපෘති අතරට අලුතින් ආරම්භ කළ ව්යාපෘති 70ක් සහ දැනට පවතින ව්යාපෘති පුළුල් කිරීම් 76ක් ඇතුළත් වූ බව සභාපතිවරයා වැඩිදුරටත් අනාවරණය කළේය.
ආයෝජන අනුමත කිරීමේ ක්රියාවලිය විධිමත් කිරීම, ව්යාපෘති ප්රගතිය නිරීක්ෂණය කිරීම සහ අනෙකුත් රාජ්ය ආයතන සමඟ සමීපව කටයුතු කිරීම හරහා ආයෝජකයන්ට හිතකර පරිසරයක් නිර්මාණය කිරීමට සහ ඔවුන්ගේ විශ්වාසය තහවුරු කිරීමට ආයෝජන මණ්ඩලය පියවර ගෙන ඇති බවද අර්ජුන හේරත් මහතා ප්රකාශ කර සිටියි.
