ඇමතිගේ ප්‍රකාශයට ශ්රී ලංකා අධිකරණ සේවා සංගමය අප්‍රසාදය පළ කරයි
පාර්ලිමේන්තු විවාදයක් අතරතුර අධිකරණ අමාත්‍යවරයා අධිකරණ පද්ධතිය විවේචනයට ලක්කරමින් කළ ප්රකාශය වගකීම් විරහිත බවත් ඒ පිළිබද ශ්රී ලංකා අධිකරණ සේවා සංගමය දැඩි අවධානය යොමුකර ඇති බවත් මාධ්‍ය නිවේදනයක් නිකුත් කරමින් එම සංගමය පවසා සිටී.
සමස්ත අධිකරණ පද්ධතියට බලපෑම්වන පරිදී ඉදිරිපත් කළ එම විවේචනයන් සත්‍යයෙන් අසත්‍ය වෙන් කර නොගෙන නඩුකරයන්වලදී අධිකරණ මගින් නීත්‍යානුකූලව නිකුත් කළ තීන්දු හා නි යෝග වලින් අතෘප්තියට පත්ව සැලසුම් සහගතව සිදුකරන ලද්දක් බව තම නිරික්ෂණය යැයි අධිකරණ සේවා සංගමය අවධාරණය කර තිබේ.
එමෙන්ම උත්තරීතර ව්‍යවස්ථාදායකය භාවිත කර ස්ථාවර නියෝග අනූඑක ඊ වගන්තිය මගින් පවතින නඩුවකට බලපෑම්වන පරිදී අදහස් ප්‍රකාශ කිරීම වළක්වා තිබීම නොසලකා වරප්‍රසාදවලට මුවාවී ජනතා පරමාධිපත්‍ය බලය ක්‍රියාත්මක කරන අධිකරණය වෙත ද්වේශ සහගත ලෙස විවේචන එල්ල කිරීම අධිකරණ ස්වාධීනත්වය ප්‍රසිද්ධියේ අභියෝගයට ලක්කිරීමක් බවද ඒම නිවේදනය මගින් වැඩිදුරටත් පෙන්වාදෙයි.
අධිකරණ පද්ධතියට එල්ලවන බාහිර බලපෑම්වලින් විනිශ්චකරුවන් ආරක්ෂා කර ගැනීමට බලවත් සහ වෙහෙසකාරි කාර්යභාරයක් ඉටුකරමින් සිටින ලේකම්වරයා ආරක්ෂා කිරීමට තම සංගමය කොන්දේසි විරහිතව හා ඒකමතිකව තම සංගමය පෙනී සිටින බව අධිකරණ සේවා සංගමය පවසා සිටී.
එමෙන්ම ශිෂ්ඨ සම්පන්න සමාජයක් උදෙසා ස්වාධීන අධිකරණයක පැවැත්ම ආරක්ෂා කර ගැනීම සෑම පුරවැසියෙකුම සතු සාමූහික වගකීමක් බවත් එහිදී පුරවැසියාගේ පරමාධිපත්‍ය බලතල ක්‍රියාත්මක කරන ප්‍රධාන ආයතන ත්‍රිත්වය එකිනෙකාගේ වගකීම් හා ගෞරවය කෙරෙහි අවබෝධයෙන් ක්‍රියා කිරීමට සමත් පුද්ගලයින්ගෙන් සමන්විත විය යුතු බව ඒම සංගමයේ අදහස වී ඇත.
ඒ වායෙහි සාමාජිකයින් වගකීම් විරහිතව පුද්ගලික අවශ්‍යතාමත අනෙකා කෙරෙහි වෛරී ආකල්පයකින් ක්‍රියාකරන තත්ත්වයට පත්වුව හොත් එයම පාරාවළල්ක් වී ආයතන ත්‍රිත්වය කෙරෙහිම මහජන විශ්වාසය ක්‍රමිකව බිද වැටීම වැළැක්විය නොහැකි බවද අධිකරණ සේවා සංගමය තවදුරටත් පෙන්වා දෙයි.
