මත්පැන් පානය කිරීමේදී එහි ප්රබලතාව මැනීමට භාවිත කරන ‘සම්මත පානය’ (Standard Drink) නමැති ඒකකයට සමානව, කංසා භාවිතයේදී එහි ප්රබලතාව සහ සෞඛ්ය අවදානම මැනිය හැකි නව සම්මත ඒකකයක් හඳුන්වා දීමට බ්රිතාන්යයේ බාත් විශ්වවිද්යාලයේ පර්යේෂකයන් සමත් වී තිබේ.
ඖෂධීය සහ විනෝදාත්මක කටයුතු සඳහා ලොව පුරා කංසා භාවිතය නීතිගත වෙමින් පවතින පසුබිමක, පාරිභෝගිකයන්ට තමන් ලබාගන්නා ප්රමාණය පිළිබඳ අවබෝධයක් ලබා දී මානසික හා ශාරීරික හානි අවම කිරීම මෙමඟින් අපේක්ෂා කෙරේ. කංසා වල අඩංගු ප්රධාන මත්කාරක රසායනය වන ‘ටෙට්රාහයිඩ්රොකැනබිනෝල්’ (THC) ප්රමාණය පදනම් කර ගනිමින් මෙම මිනුම් දණ්ඩ සකස් කර ඇති අතර, ගංජා භාවිතා කරන වාර ගණනට වඩා එහි අඩංගු THC ප්රමාණය සෞඛ්ය අවදානම තීරණය කරන ප්රධාන සාධකය බව පර්යේෂකයෝ පෙන්වා දෙති.
“Addiction” විද්යාත්මක සඟරාවේ පළ වූ මෙම අධ්යයනයට අනුව, එකම බරින් යුත් කංසා සුරුට්ටු දෙකක වුවද ප්රබලතාව අනුව අඩංගු මත් ගතිය බෙහෙවින් වෙනස් විය හැකිය. නිදසුනක් ලෙස, ග්රෑම් 0.45ක බරින් යුත් සුරුට්ටුවක ප්රබලතාව අනුව THC ඒකක 3.78 සිට 12.78 දක්වා විශාල පරාසයක වෙනස් විය හැකි බව හෙළි වී තිබේ.
කංසා භාවිතය නිසා ඇති වන ඇබ්බැහිය හෙවත් ‘ගංජා භාවිත ආබාධ’ (CUD) වළක්වා ගැනීම සඳහා වැඩිහිටියෙකු සතියකට භාවිතා කරන ප්රමාණය THC ඒකක 8කට වඩා අඩු විය යුතු බව පර්යේෂකයන්ගේ නිර්දේශයයි.
මෙම සීමාව ඉක්මවා යන පුද්ගලයන්ගෙන් 70%ක්ම විවිධ මානසික හා ශාරීරික ගැටලුවලට මුහුණ දෙන බව හෙළි වී ඇති අතර, මෙම නව ඒකකය හඳුන්වා දීම මහජන සෞඛ්ය සුරක්ෂිත කිරීමේ වැදගත් පියවරක් ලෙස සැලකේ.
