ජනාධිපතිවරණ මැතිවරණයේදී වඩා උණුසුම වැඩි වීමත් සමඟ බොදුබල සේනා සංවිධානයේ මහලේකම් පූජ්‍ය ගලගොඩඅත්තේ ඥානසාර හිමියන් නිහඩ පිළිවෙතක් අනුගමනය කරන බව වාර්තා වේ.
ඥානසාර හිමියන්ගේ සමීපතයෙකු කියා සිටියේ මේ වන විට උන්වහන්සේ පිංකම් සඳහා ද ධර්ම දේශනා සඳහා වැඩි වශයෙන් සහභාගී වන බවයි. එසේම දේශපාලන වශයෙන් උන්වහන්සේ මේ වන විට නිහඩ වී සිටින බව දැනගන්නට ඇත.
ගෝඨාභය රාජපක්ෂ පාර්ශවයෙන් පවසා සිටියේ ඥානසාර හිමියන් අවශ්‍ය වුවත් මේ අවස්ථාවේදී උන්වහන්සේ සහාය ප්‍රසිද්ධියේ ලැබීමේදී ගැටළුකාරි තත්ත්වයක් මතුවන බවයි. පසුගිය මැතිවරණයේදී පවා පරාජයට ලක්වන්නට හේතු වු කරුණු කාරණා අනුව උන්වහන්සේව දේශපාලන රැස්වීම් සඳහා සහභාගී නොකිරීමට තීරණය කර ඇති බව වාර්තා වේ.
එසේම සජිත් පාර්ශවයෙන් ද ලැබුණේ ඥානසාරි හිමියන් යම් යම් ආගම් අන්තවාදය වෙනුවෙන් කටයුතු කරන ලද අයෙකු හෙයින් උන්වහන්සේ සම්බන්ධ කර ගැනීමේදී පවා ගැටළුවක් මතුවන බවයි.
කෙසේ වෙතත් දේශපාලන පක්ෂ ආරංචි මාර්ග කියා සිටියේ ඥානසාර හිමියන්ගේ සහාය ලබා ගැනීමේදී තම කණ්ඩායමට අවාසිදායක තත්ත්වයක් මතුවන බැවින් සම්බන්ධ කර නොගැනීම වඩාත් සුදුසු බවයි.
