දිවයිනේ වායු ගෝලයේ ගුණාත්මකභාවය පහළ යාම පිළිබඳව මධ්යම පරිසර අධිකාරිය විසින් නිවේදනයක් නිකුත් කර තිබෙනවා.
දිවයිනේ ප්රදේශ කිහිපයක වායු ගෝලයේ ගුණාත්මකභාවය (Air Quality) සැලකිය යුතු ලෙස පහළ ගොස් ඇති බව මධ්යම පරිසර අධිකාරියේ මාධ්ය ප්රකාශක ආචාර්ය අජිත් ගුණවර්ධන මහතා පවසනවා.
ඊයේ (18) සිට දිවයිනේ ඇතැම් පළාත් සහ දිස්ත්රික්කවල වායු තත්ත්ව දර්ශකය 150 ත් 200 ත් අතර අගයක පැවති බවයි ඔහු පැවසුවේ.
ඒ අනුව උතුර, උතුරු මැද, වයඹ, බස්නාහිර සහ දකුණ. සහ රත්නපුර සහ කෑගල්ල මෙහි බලපැමට ලක්ව තිබෙනවා.
මෙම අගය තරමක අහිතකර තත්ත්වයක් ලෙස සැලකෙන අතර, මීට ප්රධානතම හේතුව ලෙස පෙන්වා දෙන්නේ අන්තර් දේශසීමා අතර සිදුවන වාතයේ සංසරණයයි.
කෙසේ වෙතත් ඒ මහතා පැවසුවේ ඉදිරි දින දෙකක කාලය තුළ මෙම තත්ත්වය පහව යනු ඇති බවයි.
වායු ගුණාත්මකභාවය පහළ යාම සංවේදී පුද්ගලයින්ට (ළමුන්, වැඩිහිටියන් සහ ශ්වසන රෝගීන්) බලපෑම් ඇති කළ හැකි බවත් හුස්ම ගැනීමේ අපහසුවක් හෝ ආසාත්මිකතාවයක් ඇති වුවහොත් වහාම වෛද්ය උපදෙස් ලබා ගන්නා ලෙසත් අදාල නිවේදන වල සදහන්.
මධ්යම පරිසර අධිකාරිය නිරන්තරයෙන් දිවයිනේ වායු තත්ත්ව දර්ශකය පිළිබඳව අවධානයෙන් පසුවන බවත්, මිනිස් ක්රියාකාරකම් මගින් වාතය තවදුරටත් දූෂණය වීම වළක්වා ගැනීමට මහජන සහයෝගය අවශ්ය බවත් ආචාර්ය ගුණවර්ධන මහතා අවධාරණය කර සිටියා.
