ධාවන ඉසව් හෝ දැඩි ලෙස කය වෙහෙසා සිදු කරනු ලබන ක්‍රීඩාවලට ප්‍රථම පාසල් සිසුන්ට ක්‍රීඩා වෛද්‍ය සහතිකයක් ලබා ගැනීම අනිවාර්ය කිරීමට තීරණය කර තිබේ.
සෞඛ්‍ය අමාත්‍යාංශය මෙම ක්‍රියා මාර්ගය ගෙන ඇත්තේ පසුගිය කාලයේ විවිධ ක්‍රීඩා ඉසව් සඳහා සහභාගී වූ පාසල් ළමුන් අවාසනාවන්ත ලෙස මිය යාම හේතුවෙනි.
ඒ සඳහා ප්‍රධාන රෝහල් වල ක්‍රීඩා වෛද්‍ය ඒකක ස්ථාපිත කර, ක්‍රීඩා වෛද්‍ය නිලධාරීන් අනුයුක්ත කර තිබේ.
සෞඛ්‍ය අමාත්‍යාංශය පැවසුවේ, ක්‍රීඩා තරග සඳහා සහභාගී වන ළමුන්ට සඳුදා සිට සිකුරාදා දක්වා දවස පුරා සහ සෙනසුරාදා උදේ වරුවේ අදාළ රෝහල් වෙත යොමු වී එම යෝග්‍යතා සහතිකය ලබා ගත හැකි බවයි.
මෙම ක්‍රීඩා යෝග්‍යතා සහතිකය වසරක කාලයක් සඳහා වලංගු වේ.
විශේෂයන්ම මෙහිදී ECG පරීක්‍ෂණ සිදු කෙරෙන බැවින් කල් තියා අදාළ වෛද්‍ය ඒකකයෙන් දින වෙන් කර ගෙන ඊට සහභාගි වීම හැකිය.
එම සහතිකය හිමි ක්‍රීඩකයෙකු ක්‍රීඩා ඉසව්වක් සඳහා සහභාගී වීමට දින 3ක් ඇතුළත ඔහුගේ පවුලේ වෛද්‍යවරයා ලවාද සහතික කර ගත හැකියි.
ක්‍රීඩා වෛද්‍ය නිලධාරීන්ට පමණක් ක්‍රීඩා යෝග්‍යතා වෛද්‍ය සහතිකය නිකුත් කිරීමට බලය ඇති බවත් සෞඛ්‍ය අමාත්‍යාංශය සඳහන් කළේය.
