56 දී ඇරැඹි සමාජ-සංස්කෘතික විප්ලවය තුළින් රටේ අති මහත් බහුතරය වූ සිංහල භාෂාවට රාජ්‍ය භාෂා තත්ත්වය ලබා දී, පෑගෙන පෙළෙන පීඩිත පන්තියේ දරු-දැරිවියන්ට අහිමිව පැවැති උසස් අධ්‍යාපනය ලබාදීම උදෙසා විද්‍යෝදය හා විද්‍යාලංකාර පිරිවෙන් විශ්වවිද්‍යාල තත්ත්වයට පත්කොට, උසස් අධ්‍යාපන වරම් දොරටු විවර කළේ ය.
එසේ එම වරම් හිමිකරගත්, පීඩිත පංතික දරු-දැරැවියන් විශ්වවිද්‍යාල තුළින් රැකියා සොයා සමාජයට එනවිට රටේ පාලනයේ වරම් ලබා තිබුණේ එක්සත් ජාතික පක්ෂය ප්‍රමුඛ හත්හවුල් රජයයි. පීඩිත පංතික දරු-දැරිවියන් උසස් අධ්‍යාපන වරම් ලැබීමට එරෙහිව සිටි එක්සත් ජාතික පක්ෂය එම තරුණ-තරුණියන්ගේ රැකියා ප්‍රශ්නය විසඳීමට අවධානය යොමු කළේ නැති බව ප්‍රකට ය.
මෙම රැකියා විරහිත උගත් තරුණ පරපුර රෝහණ විජේවීරයන්ට සිය මාක්ස්-ලෙනින්වාදී විප්ලවීය බීජය වැපිරීමට කදිම සරුසාර භූමියක් නිර්මාණය කරදුනි. සමාජයේ අති බහුතරය වූ ගොවි ජනතාවගේ ඉඩම් අර්බුදයත් එයට ආශීර්වාදයක් එක් කළේ ය.
මෙකී සමාජ අර්බුදය 1970 දී පැවැති මහා මැතිවරණයේ දී එක්සත් ජාතික පක්ෂය ප්‍රමුඛ හත් හවුල් ආණ්ඩුව පළවා හරිමින් ශ්‍රී ලංකා නිදහස් පක්ෂය ප්‍රමුඛ සමගි පෙරමුණ ට පාර්ලිමේන්තුවේ තුනෙන් දෙකක් බලය අත්කර දීම ට මේ රටේ ප්‍රගතිශීලී හා වාමවාදී පොදු ජනතාව තටයුතු කළහ. ඒ අයුරින් 1970 මැයි මාසයේ දී බලයට පත්කරගත් ප්‍රගතිශීලී-වාමවාදී ආණ්ඩුවට මාස 10ක් ගතවනවිට දී ම රැකියා විරහිත උගත් පරපුර දායක කරගනිමින් ආණ්ඩුවට එරෙහිව ආයුධ සන්නද්ධ කැරැල්ලක් මෙහෙයවා තරුණ-තරුණියන් දස දහසකට දිවි අහිමි කිරීමට ජනතා විමුක්ති පෙරමුණ කටයුතු කළේ, පරාජයෙන් අළුගසාදමා එක්සත් ජාතික පක්ෂයට නැගිටීමට මංපෙත් විවර කරමිනි.එම කැරැල්ලේ දී අත්අඩංගුවට පත්වූ විසිහයදහසක් තරුණ-තරුණියන් ඝාතනය නොකළ ප්‍රගතිශීලී ආණ්ඩුව ඔවුන් පුනරුත්ථාපනය කළ අතර, 1977 දී ජේ. ආර්. ජයවර්ධන ට සුපිරි බලයක් අත්කර දීමට එම තරුණ-තරුණියන් ක්‍රියාකාරී වූ අයුරුත් ප්‍රකටය.
අනතුරුව ජේ. ආර්. ලාංකීය සමාජයේ සෑම ක්ෂේත්‍රයක්ම භීෂණයට, දූෂණයට, මර්දනයට යටපත් කරමින්, නීති විරෝධීවූත්, සදාචර විරෝධීවූත් ආඥාදායක පාලනයක් ගෙනයද්දී එයට නිහඬ ආශීර්වාදයක් දෙමින් නොනැවතී, ශ්‍රී ලංකා නිදහස් පක්ෂයේ ගමනක අවසානයක් පතා, රටපුරා රැස්වීම් තැබීමට ජෙ. ආර් ගේ සහායෙන් හිරගෙදරින් එළියට පැමිණි විජේවීරයන් කටයුතු කළ අයුරුත් කියාපෑවේ ජනතා විමුක්ති පෙරමුණේ මාක්ස්වාදීත්වය ද..? ධනේෂ්වර විරෝධය දැයි අදටත් සිතා බැලීම වටී.
අඩුම තරමින්, හිට්ලර්ට එරෙහිව, මානව සංහතියේ පැවැත්ම උදෙසා රූස්වෙල්ට් හා චරුචිල් සමඟ එක්වූ රුසියානු නායක ජෝෂප් ස්ටාර්ලින් ඔප්පු කළ න්‍යායට වඩා ප්‍රායෝගිකත්වයේ වැදගත්කම ජනතා විමුක්ති පෙරමුණේ නායකයාට අවබෝධ නොවීමේ විපාකය විඳීමට සිදුවූයේ 1988 ජනාධිපතිවරණයේ දී සිරිමාවෝ බණ්ඩාරනායක මැතිනිය පරාජය කරමින් රණසිංහ ප්‍රේමදාසයන්ට බලයට ඒමට වක්‍රව උපකාර කිරීමෙන් අනතුරුවය.
වර්ෂ 2010 දී එක්සත් ජාතික පක්ෂය ප්‍රමුඛ පොදු අපේක්ෂකයා ජයග්‍රහණය කරවීමේ අසාර්ථක උත්සාහයක යෙදීමෙනුත්, නැවතත් වර්ෂ 2015 දී එක්සත් ජාතික පක්ෂය ප්‍රමුක පොදු අපේක්ෂකයා ජයග්‍රහණය කරවීමට වක්‍රව සහාය දීම මගිනුත්, 2018 ඔක්තෝබර් 26 වන දා ජනාධිපතිවරයා ද මැදිහත් වී ආණ්ඩුව වෙනස් කළ අවස්ථාවේ දී රනිල් වික්‍රමසිංහ නැවතත් අගමැති අසුනේ ඉන්දවීමට දරූ උත්සාහයත්, එක්සත් ජාතික පක්ෂයේ මහ බැංකු කොල්ලය සිදුකිරීමේ සිද්ධියෙන් පසුව එය සිදුකිරීමත් මගින් එකම වරද නැවැත නැවැත සිදුකරමින්, ජනතා විමුක්ති පෙරමුණ නව නායකත්වය යටතේ පවා පංති සටන වෙනුවට, පංති සහයෝගය, බලය හෝ ධනය හෝ වෙනුවෙන් වැලඳගනිමින් මාක්ස්-ලෙනින්වාදය ට නව අරුත් දීමේ උත්සාහයක යෙදී සිටීම අතිශය සුවිශේෂී කාරණයකි.
