මේ රටට අභාග්‍යසම්පන්න ලේ සොලවන කාලයක් නැවතත් උදා වෙන්න දෙන්නේ නැති බව විදුලිබල, බලශක්ති සහ ව්‍යාපාර සංවර්ධන අමාත්‍ය රවි කරුණානායක මහතා පවසයි. අමාත්‍යවරයා මේ බව පැවසුවේ කොළඹ නගරයේ නිවාස නොමැති ජනතාව වෙනුවෙන් ඉදිකල නිවාස යෝජනා ක්‍රම 03 ක් ජනතා අයිතියට කැපකිරීමේ අවස්ථාවට එක් වෙමිනි.
මෙම මහල් නිවාස සංකීරණයේ සමස්ත පිරිවැය රු. මිලියන 15,924 කි. මහල් 15 කින් සමන්විත මෙම නිවාස සංකීර්ණය විදුලි සෝපාන, ප්‍රජා ශාලා ඇතුළු අනෙක් ප්‍රධාන අංගෝපාංගයන්ගෙන් සමන්විත වේ.
මෙහිදී වැඩිදුරටත් අදහස් දැක්වූ අමාත්‍ය කරුණානායක මහතා,
“අද අපි නිවාස 3300 ක් ජනතා අයිතියට පවරනවා. ඒ වගේම තවත් ගෙවල් 12,000 ක් වෙනුවෙන් මුල්ගල් තියලා තිබෙනවා. මේ නිවාසත් ඉදිවීමෙන් අනතුරුව, තවත් නිවාස 50,000 ක අවශ්‍යතාවක් තිබෙනවා කොළඹ අඩු ආදායම් ලාභීන් වෙනුවෙන්. ජනතාවගේ මෙම මූලික අවශ්‍යතා සපුරාදෙමින් ඔවුන්ට වඩාත් යහපත් අනාගතයක් උදාකරන්න අපි ආර්ථිකය සකසා ගතයුතුයි. අද අපි ජනතාවගේ වැටුප් වැඩි කරලා තිබෙනවා. ඒ වගේම විශ්‍රාම වැටුප් වැඩි කරලා තිබෙනවා. රටේ ආදායමෙන් 63% ක් වැටුප් වෙනුවෙනුත්, 18% ක් පිං පඩි වෙනුවෙනුත් වැය වෙනවා. මේ සියලුම කාරණා සමග රටේ සංවර්ධන සිදු කරන එක විශාල අභියෝගයක්. මේ අභියෝග මැද්දේ අප ලැබූ සංවර්ධනය දැකලා, අන්තවාදයට අතවනන පිරිසක් සිටිනවා අපි අතරේ. ඔවුන් අපේ සහජීවනය නැති කරන්න හදනවා. නමුත් අද අපට සියලු ජාතීන්ට සියලු ආගමිකයන්ට මේ මගේ රට කියලා අනන්‍යතාවයකින් යුතුව ජීවත්විය හැකි වාතාවරණයක් ඇති කරන්න හැකිවෙලා තිබෙනවා.
2015 අපි රට බාරගන්න වෙලාවේ, ජනතාව ජිවත්වුණේ දැඩි පීඩනයකින්, ඒ වගේම බයකින්. අපිට හැකිවුණා ඒ පීඩනය, භීතිය තුරන් කරලා ජනතාවට නිදහසේ ජීවත්විය හැකි වාතාවරණයක් රට තුළ ඇති කරන්න. බියෙන්, සැකෙන් සිටි යුගයට නැවතීමේ තිතක් තියලා, සැබෑ වෙනසක් ඇති කරන්න ඕන කියලා හිතලා අපිව බලයට පත්කළ මේ රටේ ජනතාවට අපි එදත්, අදත් ඒ වගේම හෙටත් ණය ගැතියි. එදා රටේ එක් තැනකට සීමාවී තිබූ සංවර්ධනය, අද වනවිට සමස්ත දිවයිනම ආවරණය වන පරිද්දෙන් සිදු කෙරෙනවා. ඒ වගේම අපි බාරගනිද්දි විශාල ණය බරකින් යුත් මේ රට, අපේ අගමැතිතුමා ජනාධිපතිතුමත් සමග එකතුවෙලා, මාව මුදල් ඇමති බවට පත් කරලා, ඒ ණය බරෙන් රට නිදහස් කිරීමේ පෙරළියට උරදීලා කටයුතු කලා. අද රටේ සෑම තැනම පාසැල්, රෝහල්, පාරවල් ඇති වෙනවා. ඒ ඔබේ ශක්තිය තුළින් අපිට හැකි වුණා ණය බර පැත්තකට දාලා, අතිරික්තය තුළින් කෙරෙන සංවර්ධන ක්‍රියාවන්.
අප අපේ නීති පද්ධතිය ස්වාධීන වෙලා. පොලීසිය තමන්ට අවශ්‍ය පරිදි ස්වාධීනව කටයුතු කරනවා. මාධ්‍යට සැබෑ නිදහසක් ලැබිලා තිබෙනවා. ඒ හැම දේකටමත් වඩා අපට අවශ්‍ය වන්නේ රටේ ජනතාවගේ සුරක්ෂිතබාවයයි.අපේ රජය යටතේ ඒ තත්ත්වය රට තුළ ස්ථාපිත කිරීමට ලැබීම විශාල ජයග්‍රහණයක්. මේක තමයි අපි ලැබූ සැබෑම සංවර්ධනය. එදා කිව්වේ කොළඹට කිරි ගමට කැකිරි කියලා. නමුත් අද වෙලා තියන්නේ ඒකෙ අනිත් පැත්ත. ඒ තරමටම සංවර්ධනය ගමට ගෙනියන්න අපිට හැකිවුණා” යැයි අමාත්‍ය රවි කරුණානායක මහතා පැවසීය.
