අම්බලන්ගොඩ, ගලගොඩ ප්රදේශයේදී ඉකුත් ජනවාරි 28 වැනිදා ‘පොඩි දිමුතු’ නමැත්තා වෙඩි තබා ඝාතනය කිරීමේ සිද්ධියේ තීරණාත්මක තොරතුරු රැසක් අනාවරණය කර ගැනීමට ගාල්ල දිසා අපරාධ කොට්ඨාසය සමත් වී තිබේ. මෙම ඝාතනයට සහය වූ 18 හැවිරිදි තරුණයෙකු අත්අඩංගුවට ගෙන ඇති අතර, ඔහු ඝාතනයට ලක්වූ පොඩි දිමුතුගේ සමීප මිතුරෙකු බව හෙළි වී ඇත. සැකකරු පවසා ඇත්තේ ඝාතනය සිදුවූ දින තමන් මත්පැන් රැගෙන විත් දිමුතු සමඟ සාදයේ රැඳී සිටිමින් වෙඩික්කරුවන්ට අවශ්ය තොරතුරු ලබා දුන් බවයි. වෙඩි තැබීම සිදුවන අවස්ථාවේදී ඔහු එම ස්ථානයෙන් සූක්ෂ්ම ලෙස මාරු වී ගොස් තිබේ.
පොලිස් ප්රශ්න කිරීම්වලදී අනාවරණය වී ඇත්තේ බන්ධනාගාරගතව සිටින ‘ලලා’ නමැති අපරාධකරු විසින් මෙම ඝාතනය මෙහෙයවා ඇති බවයි. ඔත්තු බැලූ 18 හැවිරිදි තරුණයාට ඒ සඳහා රුපියල් 50,000ක මුදලක් ලබා දී ඇති අතර, අයිස් මත්ද්රව්ය ග්රෑම් 100ක් ලබා දෙන බවට ද පොරොන්දු වී ඇත. මත්ද්රව්ය ජාවාරම සම්බන්ධ ආරවුලක් සහ පුද්ගලික කෝන්තරයක් මෙම ඝාතනයට හේතු වී ඇති බවට සැක කෙරෙන අතර, විදේශගතව සිටින ‘කරන්දෙණිය සුද්දා’ නමැති අපරාධකරු ද මෙයට සම්බන්ධ බවට පොලිසිය සැක පළ කරයි. දකුණු පළාත භාර ජ්යෙෂ්ඨ නියෝජ්ය පොලිස්පති කිත්සිරි ජයලත් මහතාගේ උපදෙස් මත වැඩිදුර විමර්ශන ක්රියාත්මකය.
