ඌව පළාතේ බදුල්ල දිස්ත්රික්කයේ පිහිටි තෙවන විශාලතම රෝහල වන මහියංගනය මූලික රෝහල, රේඛීය සෞඛ්ය අමාත්යාංශය යටතට පවරා ගැනීමට අමාත්ය මණ්ඩල අනුමැතිය හිමිව තිබේ. සෞඛ්ය සහ ජනමාධ්ය අමාත්යවරයා ඉදිරිපත් කළ මෙම යෝජනාවට ඌව පළාත් ආණ්ඩුකාරවරයාගේ එකඟතාව ද හිමිව ඇති අතර, මෙම පියවර හරහා රෝහල තුළ තෘතීයික මට්ටමේ උසස් සෞඛ්ය සත්කාරක සේවාවන් ස්ථාපිත කිරීමට අපේක්ෂිතය. දැනට ඌව පළාත් සභාව යටතේ පාලනය වන මෙම ‘ඒ’ කාණ්ඩයේ රෝහල, අවට දිස්ත්රික්ක 6ක විසිරී සිටින ලක්ෂ 5කට අධික ජනතාවකට සිය සේවාවන් සපයනු ලබයි.
මෑතකදී ඇති වූ ‘දිට්වා’ සුළි කුණාටුව හේතුවෙන් රෝහල් ගොඩනැගිලිවලට මෙන්ම වෛද්ය සහ වෛද්ය නොවන උපකරණවලට ද දැඩි හානි සිදු වූ අතර, එමගින් සායනික සේවාවන් සැපයීමේදී විශාල බාධාවන් මතු විය. දිනෙන් දින ඉහළ යන සෞඛ්ය සේවා ඉල්ලුම සපුරාලීම සඳහා අවශ්ය වන මහා පරිමාණ යටිතල පහසුකම් සංවර්ධනය කිරීම ඌව පළාත් සභාවට දැඩි අභියෝගයක් වී තිබීම හේතුවෙන්, රජය මෙම තීරණය ගෙන ඇත. මධ්යම රජය යටතට රෝහල පවරා ගැනීමත් සමඟ නවීන පහසුකම් සහිත ගොඩනැගිලි සහ උපකරණ කඩිනමින් ලබා දීමටත්, කලාපයේ ජනතාවට ගුණාත්මක සෞඛ්ය සේවාවක් තහවුරු කිරීමටත් මින් ඉදිරියට හැකියාව ලැබෙනු ඇත.
