මත්පැන් නිෂ්පාදනය සඳහා බඩඉරිඟු ස්ප්‍රීතු භාවිතා කිරීම හේතුවෙන් ආහාර සහ සත්ව ආහාර සඳහා බඩඉරිඟු නොමැතිවීමේ අවදානමක් මතුව ඇති බව ජනාධිපති කාර්යාලයේ පැවැති සාකච්ජාවකදී අනාවරණය වී තිබේ.
ජනාධිපති ලේකම් නන්දික සනත් කුමානායකගේ ප්‍රධානත්වයෙන් පැවැති මත්පැන් නිෂ්පාදකයන්ගේ සාකච්ජාවේදී මේ බව පෙන්වා දී තිබේ.
බඩඉරිඟු නිෂ්පාදනයෙන් 30% කට අධික ප්‍රමාණයක් මත්පැන් නිෂ්පාදනය කිරීම සඳහා භාවිතා කිරීම හේතුවෙන් සත්ව ආහාර සැකසීමට නොහැකිවීමෙන් කුකුළු ව්‍යාපාරයද බිඳ වැටීමේ අවදානමක් මතු ව ඇති බව වෙළෙඳපොළ ආරංචි මාර්ග සඳහන් කරයි.
මත්පැන් නිෂ්පාදනය කිරීම සඳහා එතනෝල් භාවිතා කිරීමේ ඉල්ලුම අඩුවීම පිළිබඳවඳ ජනාධිපති කාර්යාලයේ පැවැති එම සාකච්ජාවේදී අවධානය යොමු කර තිබේ.
බඩ ඉරිඟු භාවිතාකර මත්පැන් නිපදවීම කුකුළු කෑම හිඟ වීම, බිත්තර මිල ඉහළ යාම හා ත්‍රිපෝෂ නිෂ්පාදනයටද බලපෑම් ඇති විය හැකි බව වාර්තා වෙයි. බඩ ඉරිඟු දේශීය අවශ්‍යතාවය මෙට්‍රික් ටොන් ලක්ෂ පහ ඉක්මවන අතර මෙවර නිෂ්පාදනය මෙට්‍රික් ටොන් ලක්ෂ තුනක් පමණ වන බව කෘෂිකර්ම අමාත්‍යංශ වාර්තා පෙන්වා දෙයි.
ත්‍රිපෝෂ නිෂ්පාදනය කිරීම සඳහා බඩ ඉරිඟු මෙට්‍රික් ටොන් 15000 ක් පමණ වාර්ෂිකව විදේශීය රටවලින් ආනයනය කරනු ලබයි.
