දැනට අර්බුදයට තුඩු දී ඇති ට්රැක්ටර් වින්ච් යොදා ගනිමින් සිදුකරන මාදැල් කර්මාන්තය හේතුවෙන් වෙරළාසන්න සමුද්ර පරිසර පද්ධතියට මෙන්ම සාම්ප්රදායික සුළු පන්න ධීවරයින්ට ද බරපතල හානි සිදුවන බව පරිසරවේදීන් සහ ධීවර ක්රියාකාරීන් පෙන්වා දෙයි. මිනිස් ශ්රමයෙන් ඇදීම වෙනුවට ට්රැක්ටර් භාවිතා කිරීම නිසා මාදැල කිලෝමීටර් 8 සිට 10 දක්වා වූ ගැඹුරු මුහුදේ එලීමටත්, දිනකට කිහිප වතාවක් මසුන් මැරීමටත් හැකි වී ඇති අතර, මෙමගින් සිදුවන පාරිසරික විනාශය මහා පරිමාණ ‘බොටම් ට්රෝලිං’ ක්රමයට සමාන බව ඔවුන් අවධාරණය කරයි.
යාන්ත්රික මාදැල් භාවිතය නිසා මසුන් බෝවන ස්ථාන සහ මත්ස්ය බිත්තර විනාශ වීම, මිනිස් පරිභෝජනයට ගත නොහැකි කුඩා මසුන් විශාල වශයෙන් කොටුවීම සහ වෙරළාසන්නයේ සිටින කැස්බෑවන්ගේ බිත්තර විනාශ වීම වැනි ගැටලු රැසක් උද්ගත වී ඇත. තවද, ට්රැක්ටර් රථ වෙරළ පුරා ධාවනය වීමෙන් වෙරළ පරිසරයට හානි සිදුවන අතර, එමගින් වෙරළාසන්නයේ ධීවර කටයුතුවල නිරත වන 37,000කට අධික සුළු පන්න ධීවර ප්රජාවගේ මත්ස්ය අස්වැන්න ද සීඝ්රයෙන් පහත වැටී තිබේ.
මෙම යාන්ත්රික ක්රමය ධීවර හා ජලජ සම්පත් පනත, වෙරළ සංරක්ෂණ පනත සහ ජාතික පාරිසරික පනත ඇතුළු පවතින නීතිරීති රැසක් උල්ලංඝනය කරමින් සිදුකරන්නක් බවත්, මීට පෙර දේශපාලන හිතවත්කම් මත නියමු ව්යාපෘතියක් ලෙස ලබාදී තිබූ මෙම අවසරය වත්මන් රජය විසින් අහෝසි කිරීම කාලෝචිත පියවරක් බවත් විද්වත්හු පවසති. NARA ආයතනය පවා මෙම ක්රමයේ පාරිසරික හානිය සනාථ කර ඇති බැවින්, කිසිදු දේශපාලන හෝ මූල්ය බලපෑමක් මත මෙම තහනම ආපසු හැරවීමට කටයුතු නොකරන ලෙස පරිසරවේදීන් රජයෙන් ඉල්ලා සිටී.
