ශ්‍රී ලංකාව සිය ඉතිහාසයේ විශාලතම ණය ප්‍රතිගෙවීම සිදු කර ඇත්තේ 2025 වසරේදී බව ග්‍රාමීය සංවර්ධන, සමාජ ආරක්ෂණ හා ප්‍රජා සවිබල ගැන්වීමේ අමාත්‍ය උපාලි පන්නිලගේ මහතා ප්‍රකාශ කළේය. කුරුණෑගලදී පැවැති ප්‍රජා සංවර්ධන සභා නියෝජිතයන් දැනුවත් කිරීමේ වැඩසටහනකට එක්වෙමින් අමාත්‍යවරයා පෙන්වා දුන්නේ, බොහෝ පිරිස් වැඩිම ණය වාරිකය 2028 වසරේදී යෙදෙන බවට ප්‍රකාශ කළ ද, රජය විසින් 2025 වසරේදී ඇමෙරිකානු ඩොලර් මිලියන 3,900ක (කෝටි 390ක) දැවැන්ත ණය වාරිකයක් ගෙවා නිම කළ බවයි. ඒ හා සසඳන විට 2028 වසරේදී ගෙවීමට ඇත්තේ ඩොලර් මිලියන 3.2ක් වැනි සුළු මුදලක් බව ද ඔහු එහිදී අනාවරණය කළේය.
2025 වසරේදී වාහන ආනයනය සඳහා ඇමෙරිකානු ඩොලර් මිලියන 2,100ත් 2,200ත් අතර මුදලක් වැය කළ ද, වසර අවසානයේ ඩොලර් මිලියන 1,700ක අතිරික්තයක් පවත්වා ගැනීමට රජය සමත් වූ බව අමාත්‍යවරයා වැඩිදුරටත් පැහැදිලි කළේය. එම වසරේ උපයා ඇති සමස්ත ආදායම ඩොලර් මිලියන 29,300ක් වන අතර වැය කර ඇත්තේ ඩොලර් මිලියන 27,600ක් පමණක් වීම මෙම ආර්ථික ස්ථාවරත්වයට හේතු වූ බව ඔහු පෙන්වා දුන්නේය. මෙම දත්ත මඟින් රටේ මූල්‍ය කළමනාකරණය නිසි මඟක පවතින බව සනාථ වන බව ද අමාත්‍ය පන්නිලගේ මහතා මෙහිදී අවධාරණය කළේය.
