දේශපාලන පක්ෂ හා ස්වාධීන කණ්ඩායම් විසින් ඒ ඒ කොට්ඨාශවල පිහිටුවා තිබෙන මැතිවරණ ප්‍රචාරක කාර්යාල සියල්ලම හෙට (12 වැනිදා) මධ්‍යම රාත්‍රියේ සිට ඉවත් කිරීමට කටයුතු නොකළහොත්, ඒවා වහාම ඉවත් කිරීමට පොලිසියට උපදෙස් ලබාදී ඇතැයි මැතිවරණ කොමිෂන් සභාවේ සභාපති ආර්.එම්.ඒ.එල්.රත්නායක පැවැසීය.
පාර්ලිමේන්තු මැතිවරණයේ සියලුම ප්‍රචාරක කටයුතු අද (11 වැනිදා) මධ්‍යම රාත්‍රියෙන් අවසන් වන බවද ඔහු කීවේය.
අද මධ්‍යම රාත්‍රි 12 සිට නිහඩ කාලය ක්‍රියාත්මක වන බවත්, හෙට (12 වැනිදා), අනිද්දා (13 වැනිදා) සහ 14 වැනිදා කිසිදු ප්‍රචාරක කටයුත්තක් සිදු කිරීමට නොහැකි බවත්, එම දින කීපය තුළ ජනමාධ්‍ය මගින්ද කිසිදු ප්‍රචාරක කටයුත්තක් සිදු කිරීමට නොහැකි බවද ඔහු පැවැසීය.
එම කාලය තුළ මාධ්‍යයෙන් මුදල් ගෙවා ප්‍රචාරක දැන්වීම් පළකිරීම සම්පූර්ණයෙන්ම තහනම් බවද සභාපතිවරයා සඳහන් කළේය.
මැතිවරණ කොට්ඨාශය සඳහා අදාළ දේශපාලන පක්ෂය හෝ ස්වාධීන කණ්ඩායම වෙනුවෙන් එක් මධ්‍ය මැතිවරණ කාර්යාලයක් පවත්වාගෙන යාමට හැකි බවත්, ඒ වගේම අදාළ අපේක්ෂකයා වෙනුවෙන් එක් මැතිවරණ කොට්ඨාශයක එක් කාර්යාලයක් සහ අපේක්ෂකයාගේ නිවස කාර්යාලය ලෙස භාවිත කිරීමට හැකි බවද සභාපතිවරයා පැවැසීය. එම කාර්යාල කිසිවෙක ප්‍රචාරක කටයුත්තක් හෝ අපේක්ෂකයා ප්‍රවර්ධනය වන ආකාරයෙන් කිසිදු සැරසිල්ලක් සිදු නොකළ යුතු බවත්, එය සපුරා තහනම් බවත් ඔහු කීවේය.
එමෙන්ම, ඡන්ද මධ්‍යස්ථානයේ සිට මීටර් 500 ක් ඇතුළත ප්‍රචාරක කාර්යාලයක් පවත්වාගෙන යන්නේ නම් එය ඡන්ද විමසීමේ දිනයේදී ඉවත් කරගත යුතු බවත්, අදාළ කලාපය තුළ අපේක්ෂකයාගේ නිවස පිහිටා ඇත්නම් එහි කිසිදු සැරසිල්ලක් පවත්වාගෙන යාමට නොහැකි බවත් සභාපතිවරයා සඳහන් කළේය
