වැඩි පොලී දෙන බව පවසා රුපියල් කෝටි 900කට අධික මහජන මුදල් වංචා කර වසර ගණනාවක් කැනඩාවේ සැඟව සිටි මීගමුව ‘සිංහ කැපිටල් ඉන්වෙස්ට්මන්ට්’ මූල්ය ආයතනයේ ආරම්භක අධ්යක්ෂවරයෙකු වන රවි කුමාර නැමැත්තා කටුනායක ගුවන් තොටුපළේදී අපරාධ පරීක්ෂණ දෙපාර්තමේන්තුව (CID) විසින් අත්අඩංගුවට ගෙන තිබේ.
සැකකරු ඊයේ අධිකරණයට ඉදිරිපත් කිරීමෙන් අනතුරුව ලබන මස 5 වැනිදා දක්වා රක්ෂිත බන්ධනාගාරගත කිරීමට කොළඹ ප්රධාන මහේස්ත්රාත් අසංග බෝදරගම මහතා නියම කළේය.
මෙම වංචාවට අදාළව කොළඹ මහාධිකරණය මගින් තහනමට ගෙන තිබූ රුපියල් කෝටි 34ක දේපළක් සැකකරු විසින් හොර රහසේ විකුණා ඇති බව විමර්ශනවලදී හෙළි වී තිබේ.
රජයේ නීතිඥ ශක්ති ජාගොඩආරච්චි මහතා අධිකරණයට දැනුම් දුන්නේ, එම දේපළ විකුණා රුපියල් කෝටි 32ක බැංකු ණයක් පියවා ඉතිරි රුපියල් කෝටි 2ක මුදල ද රැගෙන මොහු මෙරටින් පළා ගොස් ඇති බවයි.
වසර ගණනාවකට පසු යළි ලංකාවට පැමිණෙන අවස්ථාවේදී අත්අඩංගුවට ගත් සැකකරු සම්බන්ධයෙන් තවදුරටත් පුළුල් විමර්ශන පවත්වන බව රහස් පොලිසිය අධිකරණයට දන්වා සිටියේය.
