වැරදි කරන්නට සිදු කිරීමට පෙර කල්පනා කළා නම් අද බන්ධනාගාරවල පසු තැවෙන්න ඕන නැති බවත් ඇතැම් අය බන්ධනාගාරගතව සිට නිදහස්ව ගිහිං නැවතත් ඒ වරදම සිදු කරන බව අධිකරණ හා බන්ධනාගාර ප්‍රතිසංස්කරණ අමාත්‍ය නීතිඥ තලතා අතුකෝරළ මහත්මිය පවසයි.
අමාත්‍යවරිය මේ බව පැවසුවේ පසුගියදා පල්ලෙකැලේ දුම්බර බෝගම්බර බන්ධනාගාරයේ කටයුතු නිරීක්ෂණයට එක් විමෙන්.
එහිදී අමාත්‍යවරිය බන්ධනාගාරයේ රැදවියන් හමුවෙමින් ඔවුන්ට පවතින ගැටළු පිළිබදව විමසමින් ඒ සදහා ලබාදිය හැකි විසදුම් එම අවස්ථාවේම ලබාදීමට ද කටයුතු කළාය.
විශේෂයෙන් රැදවියන්ට පවතින සුභ සාධන කටයුතු පිළිබදව අවධානය යොමු කළ අධිකරණ අමාත්‍යවරිය සදහන් කළේ ඉදිරියේදී රැදවියන්ට ලබා දෙන සුභ සාධන පහසුකම් තවදුරටත් වැඩි දියුණු කිරීමට කටයුතු කරන බවයි.
රැදවියන් සමග සාකච්ඡා කළ අධිකරණ අමාත්‍යවරිය සදහන් කළේ වැරදි සිදු කිරිමට පෙර කල්පනා කළා නම් අද සිර ගෙවල් වල පසු තැවීමට අවශ්‍ය නොවන බවයි.
සමාජයේ අනෙක් පුද්ගලයින් ද අපරාධ, වැරදි සිදු කිරීමට පෙර කල්පනා කළ යුතු බවත් හිදිසි තීරණ ගෙන කටයුතු සිදු කළ හොත් සිරගෙවල් වල පසු තැවීමට සිදු වන බවත් අමාත්‍යවරිය සදහන් කළාය.
