ලංකා විදුලිබල මණ්ඩලය ප්රතිව්යුහගත කිරීමේ ක්රියාවලිය යටතේ හඳුන්වා දුන් ස්වේච්ඡා විශ්රාම ගැන්වීමේ ක්රමය (VRS) ක්රියාත්මක කිරීම ප්රමාද වීම හේතුවෙන් දැඩි අසීරුතාවට පත්ව සිටින සේවකයින් 2,200ක පමණ පිරිසක් මල්වතු සහ අස්ගිරි මහා නාහිමිවරුන් ප්රමුඛ මහා සංඝරත්නය වෙත සිය දුක්ගැනවිල්ල ඉදිරිපත් කර තිබේ. රජය ලබාදුන් නිල පොරොන්දු මත විශ්රාම ගැනීමට අයදුම් කළ ද, ප්රතිව්යුහගත කිරීමේ “නියමිත දිනය” (Appointed Date) මෙතෙක් ගැසට් පත්රයක් මගින් ප්රකාශයට පත් නොකිරීම නිසා තමන් දැඩි මානුෂීය අර්බුදයකට මුහුණ දී සිටින බව සේවක එකමුතුව පවසයි.
විශ්රාම යාමේ බලාපොරොත්තුවෙන් විශාල මුදලක් වියදම් කර විදේශ රැකියා සඳහා සූදානම් වූ සේවකයින්ට එම අවස්ථා අහිමි වීමේ අවදානමක් මතුව ඇති බවත්, ඇතැම් සේවකයින්ගේ දරු පවුල් දැනටමත් විදේශගත වී ඇති බැවින් පවුල් ඒකක බිඳ වැටී ඇති බවත් එම සේවකයෝ පෙන්වා දෙති. තවත් පිරිසක් විශ්රාම වැටුප් බලාපොරොත්තුවෙන් ව්යාපාරික කටයුතු සඳහා ණය මුදල් ලබාගෙන ඇති අතර, මෙම ප්රමාදය හේතුවෙන් ඔවුන් මූල්යමය වශයෙන් දැඩි පීඩනයකට ලක්ව සිටිති. මෙම ගැටලුවට විසඳුමක් ලෙස, අදාළ දිනය වහාම ගැසට් මගින් ප්රකාශයට පත් කරන ලෙස රජයට උපදෙස් දෙන ලෙස හෝ ප්රතිව්යුහගත කිරීමේ කටයුතු නිමවන තෙක් තමන්ට අනුමත වැටුප් රහිත නිවාඩු ලබාදෙන ලෙස ඔවුහු මහා නාහිමිවරුන්ගෙන් ඉල්ලා සිටිති.
