2026 වසරේ ජනවාරි මාසයේදී ශ්රී ලංකාවට පැමිණි සංචාරකයින් සංඛ්යාව මෙතෙක් ජනවාරි මාසයක වාර්තා වූ ඉහළම අගය ගත් නමුත්, එමගින් ලැබුණු ආදායම පසුගිය වසරට සාපේක්ෂව පහළ ගොස් ඇති බව නවතම දත්ත පෙන්වා දෙයි. ජනවාරි මාසය තුළ සංචාරකයින් 277,327 දෙනෙකු මෙරටට පැමිණ ඇති අතර එය 2025 වසරට සාපේක්ෂව සියයට 9.7ක වර්ධනයකි. කෙසේ වෙතත්, එම මාසයේ උපයා ඇති ආදායම ඇමෙරිකානු ඩොලර් මිලියන 378.3ක් වන අතර එය පසුගිය වසරේ ජනවාරි මාසයේ ලැබූ ඩොලර් මිලියන 400.7ක ආදායමට වඩා අඩු අගයකි.
සංචාරකයින් වැඩි වශයෙන් පැමිණියද ආදායම අඩුවීමට ප්රධාන හේතුව වී ඇත්තේ සංචාරකයෙකු දිනකට වැය කරන මුදල ඩොලර් 171 සිට ඩොලර් 148 දක්වා පහත වැටීමයි. මීට අමතරව, සංචාරක ක්ෂේත්රය හරහා උපයන ආදායමෙන් විශාල ප්රමාණයක් විදේශ රටවලටම ඇදී යාම හෙවත් ‘ආර්ථික කාන්දුවීම්’ (Economic Leakages) බරපතල ගැටලුවක් බවට පත්ව තිබේ. ශ්රී ලංකා සංචාරක සංවර්ධන අධිකාරිය (SLTDA) මගින් සිදු කළ සමීක්ෂණයකට අනුව, වාර්ෂිකව ඇමෙරිකානු ඩොලර් බිලියන 1.13ක් පමණ මෙරටට අහිමි වන අතර ඉන් ඩොලර් මිලියන 800කට වැඩි ප්රමාණයක් වැය වන්නේ සංචාරක ක්ෂේත්රයට අවශ්ය ද්රව්ය ආනයනය සඳහාය.
විශේෂයෙන්ම ආයුර්වේද සහ සුවතා (Wellness) අංශයේ ආදායමෙන් සියයට 50කට වඩා වැඩි ප්රමාණයක් මෙලෙස විදේශයන්ට ඇදී යන බව හෙළි වී තිබේ. 2025 වසරේදී ද ලක්ෂ 23කට අධික සංචාරකයින් පිරිසක් පැමිණ වාර්තාවක් තැබුවද, සමස්ත ආදායම සියයට 1.6කින් පහළ ගොස් තිබුණි. මෙම දත්ත මගින් පෙනී යන්නේ සංචාරකයින් සංඛ්යාව ඉහළ නැංවීමට වඩා ඔවුන් රට තුළ වැය කරන මුදල ඉහළ නැංවීමට සහ ආදායම රට තුළ රඳවා ගැනීමට නව උපායමාර්ග අවශ්ය බවයි.
