රජයේ ඉඩම් සඳහා සින්නක්කර ඔප්පු ලබාදීමේ ‘හිමිකම’ ජාතික වැඩසටහන යටතේ මේ වන විට අයදුම්පත් 76,000ක් ලැබී ඇති බව ඉඩම් කොමසාරිස් ජනරාල් චන්දන රණවීරආරච්චි මහතා පවසයි. රජයේ ප්රවෘත්ති දෙපාර්තමේන්තුවේ පැවැති මාධ්ය හමුවකදී ඔහු සඳහන් කළේ, ඉදිරි මාස හයක කාලය තුළ මෙම සියලු අයදුම්පත් සමාලෝචනය කර සුදුස්සන් තේරීමට බලාපොරොත්තු වන බවයි. එහි මූලික අදියර ලෙස සින්නක්කර ඔප්පු 40,000ක් පමණ කඩිනමින් නිකුත් කිරීම රජයේ අරමුණ වී තිබේ.
දශක ගණනාවක සිට ශ්රී ලාංකිකයන් මුහුණ දුන් බරපතල ගැටලුවක් වූ සින්නක්කර ඉඩම් අයිතිය නොමැති වීම, මැතිවරණ සමයේ පොරොන්දුවකට පමණක් සීමා වී තිබූ බව මෙහිදී අදහස් දැක්වූ ඉඩම් හා වාරිමාර්ග නියෝජ්ය අමාත්ය අරවින්ද සෙනරත් මහතා පෙන්වා දුන්නේය. නීත්යානුකූල අයිතියක් නොමැති වීම සහ ඉඩම් සංවර්ධනය ප්රමාද වීම මෙරට ආර්ථිකයට සෘණාත්මක බලපෑමක් එල්ල කළ බවත්, වත්මන් රජය ක්රමානුකූල සැලසුමක් යටතේ ඊට ප්රායෝගික විසඳුමක් ලබා දීමට පියවර ගෙන ඇති බවත් ඔහු වැඩිදුරටත් පැවසීය.
රජයේ ඉඩම්වල දැනට පදිංචිව සිටින පුද්ගලයන්ට පූර්ණ අයිතිය පවිරන ‘හිමිකම’ ජාතික වැඩසටහන නිල වශයෙන් ආරම්භ කිරීම ලබන පෙබරවාරි 27 වනදා අනුරාධපුරයේදී සිදු කෙරේ. ජනාධිපති අනුර කුමාර දිසානායක මහතාගේ ප්රධානත්වයෙන් පැවැත්වෙන මෙම උත්සවයේදී පළමු කණ්ඩායම සඳහා සින්නක්කර ඔප්පු ප්රදානය කිරීමට නියමිතය. මෙම වැඩසටහන හරහා ඉඩම් අයිතිය පිළිබඳ ගැටලුවලට ස්ථිර විසඳුමක් ලැබෙනු ඇති බවට රජය විශ්වාසය පළ කරයි.
