එක්සත් ජාතික පක්ෂයේ ප්‍රතිපත්ති ප්‍රකාශය ලබන 21 දා වන විට ප්‍රකාශයට පත් කරන අතරම ප්‍රජාතන්ත්‍රවාදය නැවතත් ස්ථාපිත කරලා රැකගත්තාසේම, සිදුවූ වැරදි අඩුපාඩු නැවතත් නොවෙන්නට වගබලාගෙන, ඉදිරියේදීත් ජනතාවට බියක් සැකක් නොමැතිව සමගියෙන් සාමයෙන් ජීවත්වීමේ හැකියාවක් ඇතිකරනවා යැයි එක්සත් ජාතික පක්ෂ උපනායක, විදුලිබල, බලශක්ති සහ ව්‍යාපාර සංවර්ධන අමාත්‍ය රවී කරුණානායක මහතා පවසයි.
කරුණානායක මහතා මේ බව පැවසුවේ ගෙයින් “ගෙට – හදවතින් හදවතට” මට්ටක්කුලිය, අලුත් මාවත මැතිවරණ ප්‍රචාරක වැඩසටහනට සහභාගි වෙමින්.
එහිදී අදහස් දැක් වු අමාත්‍ය කරුණානායක මහතා, “උතුරු කොළඹ ආසනය විවිධ ජාතීන් රාශියක් බොහෝම සමගියෙන් එකට ජීවත් වෙන ආසනයක්. විවිධ ජාතීන් අතර ඇතිවී තිබෙන සාමය, සහජීවනය අද අපිට මේ ප්‍රදේශයෙන්ම පැහැදිළිව පෙනෙනවා. අන්තවාදය වපුරන කිහිප දෙනෙක් මේ තත්ත්වය විකෘති කරනවා. අන්න ඒ නිසා තමයි අද අපි ගෙයින් ගෙට ගිහින් මේ සමගිය සනාථ කරන්නේ. ඇල්පිටිය ඡන්දයෙන්ම පේනවා ශ්‍රී ලංකා නිදහස් පක්ෂය පොහොට්ටුවට යනවා කියලා කියන කටකතා අසත්‍ය බව. ඔවුන් එහෙම යන්න ඕනනම් මේ වෙද්දි යනවා. නමුත් මෙවර ජනාධිපතිවරණයේදී ශ්‍රී ලංකා නිදහස් පාක්ෂිකයෝ ඡන්දය ලබාදෙන්නේ හංසයාට කියලා මට විශ්වාසයි. අපට අන්තවාදය වපුරන්න අවශ්‍ය වෙන්නේ නැහැ. අපි රටේ කොතන ගියත් කියන්නේ එකම කතාවයි. ඒ තුළින් තමයි අපි සමගිතාවය තහවුරු කරන්නේ. මෙන්න මේක තමයි අපේ ප්‍රතිවිරුධ කණ්ඩායම් වලට බලන් ඉන්න බැරිම දේ. ඇල්පිටිය ඡන්දය කියන්නේ ඉතාමත් සුළු ඡන්ද ප්‍රමාණයක් තිබෙන එකක්. ජනාධිපතිවරණය සමග කොහොමද ඒක සංසන්දනය කරන්නේ. දියේ ගහගෙන යන කෙනෙක් පිදුරු ගහක හරි එල්ලෙනවා වගේ, මොකක්ද මේ ඇල්පිටිය චන්දයක් අල්ලගෙන කියවන්නේ. එක්සත් ජාතික පක්ෂයේ ප්‍රතිපත්ති ප්‍රකාශය මේ මාසේ 21 දා වනවිට ප්‍රකාශයට පත් කරනවා. අපි මහන්සියෙන්, කැපවීමෙන් වැඩකරලා නොවැම්බර් 16 දා අනිවාර්යයෙන්ම විශිෂ්ඨ විජයග්‍රහණයක් ලබාගන්නවා” යැයි පැවසීය.
