ජෙරුසලමේ ලතින් කුලදෙටු පියර්බැටිස්ටා පිසබල්ලා (Pierbattista Pizzaballa) කාදිනල්තුමන්ට ගොක් අඟහරුවාදා (Palm Sunday) මෙහෙය පැවැත්වීම සඳහා ‘ශුද්ධ වූ සොහොන් ගෙය’ (Church of the Holy Sepulchre) දේවස්ථානයට ඇතුළු වීමට පනවා තිබූ බාධාවන් ඉවත් කිරීමට ඉශ්රායල අගමැති බෙන්ජමින් නෙතන්යාහු පියවර ගෙන තිබේ. මීට පෙර ආරක්ෂක හේතූන් මත කාදිනල්තුමාව එම ස්ථානයට ඇතුළු වීමෙන් වැළැක්වීමට ඉශ්රායල පොලිසිය කටයුතු කර තිබූ අතර, අගමැතිවරයා පවසා ඇත්තේ ඉරානය විසින් එල්ල කරනු ලබන බැලිස්ටික් මිසයිල ප්රහාර ජෙරුසලමේ ශුද්ධ වූ ස්ථාන ඉලක්ක කර ගනිමින් පවතින බැවින් මෙම තීරණය ගත් බවයි. කෙසේ වෙතත් සියවස් ගණනාවකට පසු ලතින් කුලදෙටු හිමිනමකට මෙලෙස ශුද්ධ වූ ස්ථානයකට ඇතුළු වීමට බාධා කළ පළමු අවස්ථාව මෙය බව පවසමින් පල්ලිය සිය දැඩි විරෝධය පළ කළේය.
මෙම සිදුවීම ලොව පුරා බිලියන සංඛ්යාත ක්රිස්තියානි බැතිමතුන්ගේ ආගමික හැඟීම්වලට කරන බලවත් අගෞරවයක් බව කුලදෙටු කාර්යාලය ප්රකාශ කළ අතර, ඇමරිකාව ඇතුළු බටහිර රටවල් ද මෙම අවහිර කිරීම දැඩි ලෙස විවේචනය කර තිබුණි. ඉශ්රායලයේ ඇමරිකානු තානාපති මයික් හකබී මෙය “සාධාරණීකරණය කළ නොහැකි මැදිහත් වීමක්” ලෙස හඳුන්වා දුන් අතර, පසුව අගමැතිවරයා ප්රකාශ කළේ දැන් කාදිනල්තුමන්ට එම ස්ථානයට “පූර්ණ සහ වහාම ප්රවේශය” හිමි වන බවයි. ජේසුස් ක්රිස්තුන් වහන්සේ කුරුසියේ ඇණ ගැසූ සහ උත්ථානය වූ ස්ථානය ලෙස සැලකෙන මෙම දේවස්ථානය ක්රිස්තියානි ලෝකයේ අතිශය ශුද්ධ වූ ස්ථානයක් වන බැවින්, ශුද්ධ වූ සතිය (Holy Week) ආරම්භයේදීම ඇති වූ මෙම තත්ත්වය ලෝක අවධානයට ලක්වී තිබේ.
