මැදපෙරදිග කලාපයේ (බටහිර ආසියාවේ) පවතින දැඩි යුදමය නොසන්සුන්තාවය හමුවේ සෞදි අරාබිය විසින් පෙන්නුම් කරන ලද සුවිශේෂී ඉවසීම සහ සංයමය පිළිබඳව පාකිස්ථාන අගමැති ෂෙබාස් ෂරීෆ් සිය ප්රසාදය පළ කර තිබේ. ඉකුත් ඉරිදා (මාර්තු 29) ඉස්ලාමාබාද් නුවරදී සෞදි විදේශ අමාත්ය ෆයිසාල් බින් ෆර්හාන් කුමරු සමඟ පැවති සාකච්ඡාවකදී අගමැතිවරයා අවධාරණය කළේ ඕනෑම අර්බුදකාරී අවස්ථාවකදී පාකිස්ථානය සැමවිටම සෞදි අරාබිය සමඟ උරහිසට උරහිස තබා සිටගන්නා බවයි. ඇමරිකාව සහ ඉරානය අතර සෘජු සාකච්ඡා ප්රායෝගිකව ප්රමුඛ වෙමින් පවතින පසුබිමක, එම දෙපාර්ශවය අතර සාකච්ඡා සඳහා මැදිහත්කරු ලෙස කටයුතු කිරීමට පාකිස්ථානය සූදානම් බව ද මෙහිදී ප්රකාශ විය.
මෙම හමුවට සමගාමීව, මැදපෙරදිග ගැටුම් විසඳීම සහ කලාපීය සාමය ස්ථාපිත කිරීමේ අරමුණින් සෞදි අරාබිය, ඊජිප්තුව සහ තුර්කිය යන රටවල විදේශ අමාත්යවරුන්ගේ සහභාගීත්වයෙන් යුත් විශේෂ සිව්පාර්ශවීය සමුළුවක් ද පාකිස්ථානය විසින් පවත්වනු ලැබීය. කලාපයේ ආරක්ෂක තත්ත්වය සහ සාමය උදෙසා ගත හැකි ක්රියාමාර්ග පිළිබඳව මෙහිදී දීර්ඝ ලෙස අදහස් හුවමාරු කරගත් නමුත්, සමුළුවෙන් පසු නිල ප්රකාශයක් නිකුත් කර නොමැත. කෙසේ වෙතත්, ඉරාන-ඇමරිකානු ගැටුම් උත්සන්න වීම ලෝක ආර්ථිකයට සහ ආරක්ෂාවට එල්ල කරන බලපෑම හමුවේ මුස්ලිම් රටවල් ඒකරාශී වී සාමය උදෙසා ගන්නා මෙම උත්සාහය ජාත්යන්තර අවධානයට ලක්ව තිබේ.
