පැරිස් සෙන්ට් ජර්මේන් (PSG) කණ්ඩායම සමඟ පැවති චැම්පියන්ස් ලීග් තරගය අතරතුර ඇති වූ බරපතල පාදයේ ආබාධයක් (Achilles injury) හේතුවෙන් ලිවර්පූල් ප්රහාරක හියුගෝ එඩිටිකේට (Hugo Ekitike) මෙවර පාපන්දු ලෝක කුසලානය සහ මෙම තරග වාරයේ ඉතිරි තරග සියල්ල අහිමි වන බව ප්රංශ ජාතික කණ්ඩායමේ පුහුණුකරු ඩීඩියර් ඩෙෂෑම්ප් තහවුරු කළේය. ඇන්ෆීල්ඩ් ක්රීඩාංගණයේදී පැවති එම තරගයේ පළමු භාගයේදීම ඔහුට පිටියෙන් ඉවත් වීමට සිදු වූ අතර, මෙම ආබාධය හේතුවෙන් ඔහුට මීළඟ තරග වාරයේ ආරම්භය ද අහිමි වීමේ අවදානමක් පවතින බව ලිවර්පූල් බලධාරීන් සැක පළ කරති.
ප්රංශ පාපන්දු සම්මේලනය නිකුත් කළ නිවේදනයක දැක්වෙන්නේ එඩිටිකේ යනු මෑත කාලයේදී ජාතික කණ්ඩායමට එක් වූ ඉතා දක්ෂ තරුණ ක්රීඩකයෙකු බවත්, ඔහුගේ මෙම අවාසනාවන්ත පසුබෑම ප්රංශ කණ්ඩායමට මෙන්ම ඔහුට ද දැඩි බලපෑමක් එල්ල කරන බවත්ය. පසුගිය ජූලි මාසයේදී ලිවර්පූල් කණ්ඩායමට එක් වූ 23 හැවිරිදි එඩිටිකේ, මෙවර තරග වාරය තුළ ගෝල 17ක් සහ සහායක ගෝල (Assists) 6ක් වාර්තා කරමින් අතිවිශිෂ්ට දක්ෂතා දක්වා තිබුණි. විශේෂයෙන්ම කීර්තිමත් ක්රීඩක කෙනී ඩැල්ග්ලිෂ්ගෙන් පසු සිය මංගල තරග වාරයේදීම විවිධ තරගාවලි පහකදී ගෝල වාර්තා කළ දෙවන ක්රීඩකයා බවට පත්වීමට ද ඔහු සමත් විය.
ලිවර්පූල් පුහුණුකරු ආර්න් ස්ලොට් (Arne Slot) පවසන්නේ එඩිටිකේගේ ආබාධය කණ්ඩායමට දරාගත නොහැකි පාඩුවක් බවයි. දැනටමත් ජියෝවානි ලියෝනි සහ කොනර් බ්රැඩ්ලි වැනි ප්රධාන ක්රීඩකයින් ආබාධ හේතුවෙන් කණ්ඩායමෙන් ඉවත් වී සිටින පසුබිමක, එඩිටිකේ ද අහිමි වීම ලිවර්පූල් පිලට එල්ල වූ ප්රබල පහරකි. ඇමෙරිකාව, කැනඩාව සහ මෙක්සිකෝව කේන්ද්ර කර ගනිමින් මෙවර පැවැත්වීමට නියමිත ලෝක කුසලාන තරගාවලියේදී ප්රංශ කණ්ඩායමේ ප්රහාරක බලඇණියේ ප්රබලතම ක්රීඩකයෙකු වනු ඇතැයි අපේක්ෂා කළ එඩිටිකේගේ මෙම අහිමි වීම ලෝක පාපන්දු රසිකයින්ගේ ද කනගාටුවට හේතු වී තිබේ.
