වන් ෆුක් කෝර්ට් (Wang Fuk Court) නිවාස සංකීර්ණයේ පදිංචිකරුවන්ට මැයි මස 4 වැනිදා දක්වා මෙම අවස්ථාව හිමිවන අතර, එක් සංචාරයකදී පැය තුනක කාලයක් තම නිවෙස් තුළ ගත කිරීමට ඔවුන්ට අවසර ලැබේ. මෙම ගමනේදී ආරක්ෂක හිස්වැසුම්, මුහුණු ආවරණ සහ අත් වැසුම් පැළඳීම අනිවාර්ය කර ඇති අතර නිවැසියන්ට සහාය වීම සඳහා ගිනි නිවන භටයන් ඇතුළු 1,000කට අධික කාර්ය මණ්ඩලයක් යොදවා තිබේ. ගින්නෙන් දැඩි ලෙස හානි වූ නිවාස වෙත ඇතුළු විය හැක්කේ එක් පුද්ගලයෙකුට පමණක් වන අතර අනෙකුත් නිවාස සඳහා සිව් දෙනෙකුට ලියාපදිංචි වී ඇතුළු විය හැකිය.
ගින්නෙන් විනාශ වූ නිවාස වෙත පැමිණි පිරිස් අතර සිටි 50 හැවිරිදි චුන්ග් මහතා පවසා සිටියේ තම පුතුගේ ඡායාරූප ගබඩා කර ඇති පරිගණකය සොයා ගැනීම සිය ප්රධානතම අරමුණ බවයි. පදිංචිකරුවන්ගෙන් තුනෙන් එකකට වඩා වැඩි පිරිසක් වයස අවුරුදු 65 ඉක්මවූ ජ්යෙෂ්ඨ පුරවැසියන් වීම නිසා මෙම කටයුත්ත වඩාත් සංවේදී මුහුණුවරක් ගෙන තිබේ. මේ අතර හොංකොං රජය විසින් අදාළ භූමිය යළි සංවර්ධනය නොකිරීමට තීරණය කර ඇති අතර නිවාස හිමියන්ගෙන් එම දේපළ මිලදී ගැනීම සඳහා හොංකොං ඩොලර් බිලියන 4ක මුදලක් වෙන් කර ඇත.
මෙම ව්යසනයට හේතු වූ කරුණු සහ ගොඩනැඟිලි ඉදිකිරීමේදී සිදුවූ බව කියන දූෂණ වංචා පිළිබඳව සොයා බැලීමට පත් කළ ස්වාධීන කමිටුව පසුගිය මාර්තු මාසයේදී සිය විමර්ශන ආරම්භ කරන ලදී. මූලික පරීක්ෂණවලදී හෙළි වී ඇත්තේ ගොඩනැඟිල්ලේ ගිනි ආරක්ෂණ පද්ධති අක්රිය වීමට මිනිස් ක්රියාකාරකම් සෘජුවම බලපා ඇති බවයි. මෙම මහා ව්යසනය දේශපාලනීකරණය කිරීමට උත්සාහ කරන ඕනෑම අයෙකුට එරෙහිව දැඩි දඬුවම් පමුණුවන බවට හොංකොං බලධාරීන් අනතුරු අඟවා තිබේ.
