මෙම සාකච්ඡා මාලාව ඉස්ලාමාබාද් නුවර සෙරීනා හෝටලයේදී පැවැත්වීමට නියමිත අතර, ඒ වෙනුවෙන් අගනුවර ආරක්ෂාව දැඩි කර ඇති බව විදෙස් මාධ්ය වාර්තා කරයි. ඇමෙරිකානු ජනාධිපති ඩොනල්ඩ් ට්රම්ප් විසින් මෙම සාකච්ඡා සඳහා උප ජනාධිපති ජේ.ඩී. වෑන්ස් ප්රමුඛ ඉහළ පෙළේ නියෝජිත පිරිසක් නම් කර ඇති අතර ස්ටීව් විට්කොෆ් සහ ජැරඩ් කුෂ්නර් ද එම පිරිසට ඇතුළත් වේ. ඇමෙරිකානු නියෝජිත පිරිස අද සවස් කාලයේදී ඉස්ලාමාබාද් වෙත ළඟා වීමට නියමිතව ඇති බව ධවල මන්දිර ආරංචි මාර්ග තහවුරු කරයි.
මෙම සාකච්ඡාවල ප්රධානතම අරමුණ වන්නේ හෙට (අප්රේල් 21) අවසන් වීමට නියමිත සති දෙකක තාවකාලික සටන් විරාමය දීර්ඝ කිරීම සහ මැදපෙරදිග කලාපීය ස්ථාවරත්වය ඇති කිරීමයි. කෙසේ වෙතත්, ඇමෙරිකාව පනවා ඇති නාවික අවහිර කිරීම් (Naval Blockade) ඉවත් කරන තෙක් සාකච්ඡාවලට සහභාගී වීම සම්බන්ධයෙන් ඉරානය තවමත් සිය ස්ථාවරය ප්රකාශ කර නොමැත. ඉරාන නිල පුවත් ඒජන්සිය (IRNA) වාර්තා කර ඇත්තේ ඇමෙරිකාවේ “අන්තවාදී ඉල්ලීම්” සහ සටන් විරාම කොන්දේසි උල්ලංඝනය කරමින් සිදු කරන නාවික අවහිර කිරීම් හමුවේ සාකච්ඡා සාර්ථක වීමේ අවකාශය අවම බවයි.
පාකිස්තාන අග්රාමාත්ය ෂෙහ්බාස් ෂරීෆ් සහ හමුදා ප්රධානී ජෙනරාල් අසීම් මුනීර් යන මහත්වරුන් මෙම සාකච්ඡා සාර්ථක කර ගැනීම සඳහා ඉරානය සහ අනෙකුත් කලාපීය රටවල් සමඟ දැඩි ලෙස සම්බන්ධ වෙමින් මැදිහත්කරුවෙකුගේ භූමිකාව ඉටු කරති. පසුගිය අප්රේල් 11 සහ 12 දිනවල ඉස්ලාමාබාද්හිදී පැවති පළමු වටයේ සාකච්ඡා එකඟතාවයකින් තොරව අවසන් වුවද, යුද්ධය තවදුරටත් ව්යාප්ත වීම වැළැක්වීම සඳහා දෙපාර්ශ්වයම යළි සාකච්ඡා මේසයට කැඳවීමට පාකිස්තානය විශාල උත්සාහයක් දරමින් සිටී.
ගෝලීය බලශක්ති වෙළඳපොළට සහ ආරක්ෂාවට දැඩි බලපෑමක් එල්ල කරන මෙම යුදමය වාතාවරණය හමුවේ, හෙට පැවැත්වීමට නියමිත මෙම දෙවන වටයේ සාකච්ඡා ලෝක ප්රජාවගේ දැඩි අවධානයට ලක්ව තිබේ.
