භික්ෂු සමාජය නියාමනය කිරීම සඳහා කඩිනමින් සංඝාධිකරණ පනතක් පාර්ලිමේන්තුවට ඉදිරිපත් කළ යුතු බව ජාතික නාමල් උයනේ නිර්මාතෘ වනවාසී රාහුල හිමියෝ අවධාරණය කරති. ජාතික නාමල් උයන පරිශ්රයේදී ඊයේ (30) පැවති මාධ්ය හමුවකදී උන්වහන්සේ මෙම අදහස් පළ කළහ.
පැවිදි දිවියට ඇතුළත් වූවද භික්ෂූන් වහන්සේලා යනු හැඟීම් දැනීම් සහ විවිධ ආශාවන් සහිත මනුෂ්ය කොට්ඨාසයක් බව උන්වහන්සේ සඳහන් කළහ. බුදුරජාණන් වහන්සේ පවා භික්ෂූන් වහන්සේලා අතින් සිදුවූ වැරදි පදනම් කරගනිමින් නීති පනවා ඇති බැවින්, වර්තමානයේදී ද උන්වහන්සේලා නිවැරදි මාවතකට යොමු කිරීම අත්යවශ්ය බව උන්වහන්සේගේ අදහසයි.
ශ්රී ලංකාවේ භික්ෂූන් වහන්සේලා මත්ද්රව්ය සමඟ අත්අඩංගුවට පත්වීමේ සිදුවීම් විදෙස් මාධ්යවල පවා වාර්තා වීම බරපතළ ඛේදවාචකයක් බව රාහුල හිමියෝ පෙන්වා දුන්හ. මෙම තත්ත්වය පාලනය කිරීම සඳහා සංඝාධිකරණ පනතක් හරහා වැරදි කරන පාර්ශ්වයන්ට දඬුවම් දීමේ විධිමත් ක්රමවේදයක් අවශ්ය බවත්, විහාර දේවාලගම් පනත ද කාලීන අවශ්යතාවන්ට අනුව සංශෝධනය කළ යුතු බවත් උන්වහන්සේ අවධාරණය කළහ.
පසුගිය රජයයන් ගණනාවකටම මෙම කරුණු ඉදිරිපත් කළද කිසිදු නිසි පියවරක් නොගත් බවත්, ඇතැම් නිකාය මූලස්ථාන මගින් මීට බාධා එල්ල වන බවට මතයක් පවතින බවත් උන්වහන්සේ සිහිපත් කළහ. එබැවින් මේ සම්බන්ධයෙන් වත්මන් ජනාධිපතිවරයාගේ විශේෂ අවධානය යොමු විය යුතු බවට වනවාසී රාහුල හිමියන් ඉල්ලීමක් කර සිටිති. එමෙන්ම වැරදිවලට සම්බන්ධ වන තරුණ භික්ෂූන්ගේ හැසිරීම් පිළිබඳව ඒ ඒ නිකායන් සහ ගුරු හිමිවරුන් වගකීම භාරගත යුතු බව ද උන්වහන්සේ වැඩිදුරටත් ප්රකාශ කළහ.
